Сот бұрынғы жұбайының төрт туысын өлтірді деп айыпталған Атырау облысының тұрғыны Сұлтан Сарсемалиевке өмір бойына бас бостандығынан айыру жазасын тағайындады.
«Іс бірнеше ай бойы қаралып, көптеген сот отырысымен өтті. Сотталушының мінез-құлқы бірнеше рет жұртшылықтың назарын аударды. Сот процесі барысында ол сабырлы қалып сақтап, күлімсіреп, кейде күліп отырды және эмоциясын байқатпады. Тек әкесі сот залына келген кезде ғана көз жасына ерік берді. Сот барысында Сарсемалиев Наурыз Мұқанғалиевті қасақана өлтіргенін жоққа шығарды. Оның айтуынша, араларында жанжал туындап, ол өзін қорғау мақсатында әрекет еткен. Алайда сот бұл уәждерді негізсіз деп таныды. Сонымен қатар Сарсемалиев қаза тапқандарды кінәсіз деп есептемейтінін айтып, болған оқиғаны бұрынғы жұбайының туыстарымен ұзақ жылдарға созылған жанжалмен байланыстырды», – деп хабарлайды 24.kz.
Төрт адамның өмірін қиып, кейін Индонезияға қашқан, кейіннен Интерполдың көмегімен ұсталған адамға өмір бойына бас бостандығынан айыру жазасының тағайындалуы заңды шешім болды.
Сот отырыстары барысында Сұлтан Сарсемалиев қайғылы оқиғаға бұрынғы жұбайының туыстарының отбасы өміріне үнемі араласуы себеп болғанын айтқан. Сондай-ақ ол шетелге тергеуден жасырыну үшін емес, «Құдайдан кешірім сұрау мақсатында» барғанын мәлімдеді. Алайда сот бұл түсініктемелерді негізді деп тапқан жоқ.
Тіпті сотталған азаматтың туыстар арасында ұзаққа созылған келіспеушілік болғаны жөніндегі сөздері шындыққа сәйкес келгеннің өзінде, бұл адамның өмірін қасақана қиюды ақтай алмайды. Сондықтан мұндай адамның қоғамнан оқшаулануы орынды.
