ДЕЛИ. 15 шілде. ИНТЕРФАКС – АҚШ Сенатына енгізілген Ресей мұнайын ең көп сатып алатын елдерге баж салығын салуды көздейтін заң жобасы Вашингтон мен Нью-Дели арасындағы сауда келіссөздерінің барысына кері әсер етуі мүмкін. Бұл туралы Bloomberg агенттігі дереккөздерге сілтеме жасап хабарлады.
«Шенеуніктердің бірінің айтуынша, бұл ұсыныс Үндістан билігі үшін күтпеген жағдай болды. Себебі Нью-Делидің Ресей мұнайын сатып алуы мәселесі ақпанда алдын ала келісімге қол жеткізілген келіссөздер барысында талқыланған болатын. Сонымен қатар бұл тақырып соңғы келіссөздерде қайта көтерілген жоқ», – деп жазады агенттік.
Сонымен бірге дереккөздердің айтуынша, Үндістан әзірленіп жатқан заң жобасын жария түрде сынға алмайды. Керісінше, Нью-Дели қазіргі келіспеушіліктерді екі ел арасындағы ауқымды сауда келісіміне апаратын аралық кезең ретінде бағалап, АҚШ-пен келіссөздерді жалғастыруға ниетті.
Әзірге Үндістан АҚШ-пен алдын ала сауда келісіміне қол қойған жоқ. Қазіргі таңда үнді тауарларына 10 пайыздық баж салығы қолданылады. Оның мерзімі 24 шілдеде аяқталады. Егер тараптар келісімге келе алмаса, АҚШ Үндістан экспортына жоғарырақ баж салығын енгізуі мүмкін.
Бұған дейін CBS News Ресейге қарсы қосымша санкциялар енгізуге мүмкіндік беретін заң жобасының жаңартылған нұсқасы АҚШ Сенатының қарауына ұсынылғанын хабарлаған болатын.
Заң жобасының негізгі тетіктерінің бірі – Ресей мұнайын ең көп сатып алатын бес мемлекетке қатысты 100 пайызға дейінгі баж салығын енгізу мүмкіндігі. CBS News мәліметінше, қазіргі уақытта бұл елдер – Қытай, Үндістан, Словакия, Венгрия және Әзербайжан.
Сондай-ақ Ресей газын ең көп сатып алатын бес елге қатысты да баж салығын енгізу қарастырылған. Қазіргі таңда олардың қатарында Қытай, Франция, Бельгия, Жапония және Венгрия бар.
