ҚазОжРИ (Қазақ онкология және радиология ғылыми-зерттеу институты) хабарлайды: «18 шілдеде Қазақстанның барлық мемлекеттік онкологиялық орталықтарында тері және сүйек саркомасын ерте анықтауға арналған Бірыңғай ашық есік күні өтеді. Сағат 9.00-ден 13.00-ге дейін ел тұрғындары онколог маманнан тегін кеңес алып, алғашқы тексеруден өте алады. Сондай-ақ алдын алу шаралары бойынша ұсыныстар беріліп, көрсеткіштер болған жағдайда қосымша зерттеулер тағайындалады. Саркома — сирек кездесетін, бірақ сүйек пен жұмсақ тіндерде өте тез өршитін қатерлі ісіктің бірі. Ауруды неғұрлым ерте анықтаса, ем де соғұрлым тиімді болады. Бұл дертті алғашқы сатысында емдеуге және науқастың толық сауығып кетуіне қолайлы мүмкіндік береді. Қазақстанда жыл сайын саркоманың 150-ден астам жаңа жағдайы тіркеледі, ал қазіргі уақытта 1700-ден астам пациент мамандардың диспансерлік бақылауында тұр. Дәрігерлер жұмсақ тіндерде біртіндеп үлкейіп бара жатқан ісіктер немесе түйіндер пайда болғанда, сүйек сырқырап, ұзақ уақыт ауырғанда, дене мүшелері ісінгенде немесе басқа да күмәнді белгілер байқалғанда дәрігерге көрінуді кейінге қалдырмауға кеңес береді. Ауру әбден асқынғанша күтіп отырудың қажеті жоқ. Маманға жасалған бір ғана профилактикалық сапар дертті дер кезінде анықтап, емнің сәтті өтуіне септігін тигізеді. 18 шілде күні өз денсаулығыңызды тегін тексерту мүмкіндігін қалт жібермеңіз. Себебі дертті ерте анықтау — қатерлі ісікпен күресудің ең тиімді жолы».
Еуразия24 пікірі:
Қазақстанда онкологиялық ауруларды диагностикалау, хирургиялық емдеу және дәрілік терапияны қоса алғанда, онкологиялық көмек халықтың барлық санаты үшін тегін көрсетіледі. Қатерлі ісікті ерте кезеңде анықтау емнің нәтижесіне тікелей әсер ететіндіктен, дәрігерлер әртүрлі онкологиялық ауруларға арналған Бірыңғай ашық есік күндерін тұрақты түрде өткізіп келеді. Жылына бірнеше рет кез келген адам алдын ала жазылмай-ақ бейінді маманның тегін қабылдауына барып, тексеруден өте алады. Бұл ерте диагностиканың қолжетімділігін арттыруға мүмкіндік береді. Елдің онкологиялық қызметі соңғы жылдары оң нәтижелер көрсетіп келеді. Соңғы бес жыл ішінде Қазақстанда онкологиялық аурулардан болатын өлім-жітім 20 пайызға төмендеген.
«Мұндай нәтижелерге 2023–2027 жылдарға арналған онкологиялық аурулармен күрес жөніндегі кешенді жоспарды іске асыру аясында қол жеткізілді. ҚР Денсаулық сақтау министрлігінің мәліметінше, 2025 жылы қатерлі ісіктің 42 мыңнан астам жаңа жағдайы тіркелген. Бұл соңғы бес жылдағы орташа көрсеткіштен 7,8 пайызға жоғары және ерте анықтау деңгейінің жақсарғанын көрсетеді. Қазіргі уақытта 246 205 пациент динамикалық бақылауда болса, олардың 55 пайыздан астамы – еңбекке қабілетті жастағы азаматтар. Бес жыл және одан да ұзақ өмір сүретін науқастардың үлесі 63 пайызға дейін өсті. Ерте диагностика деңгейі 33 пайыздан асты. Ал онкологиялық аурулардан болатын өлім-жітім 100 мың тұрғынға шаққанда 61 жағдайға дейін төмендеді», – деп хабарлаған еді бұқаралық ақпарат құралдары қаңтар айында. Бұл деректер онкологиялық қызметті дамытуға бағытталған инвестициялардың нақты нәтиже бере бастағанын көрсетеді. Ал осындай профилактикалық іс-шаралар ауруды емдеудің тиімділігі жоғары болатын ерте кезеңде анықтауға мүмкіндік береді.
