Нью-Йорк. 16 шілде. ИНТЕРФАКС – АҚШ-тың негізгі қор индекстері сәрсенбі күні инфляцияның баяулағанын көрсеткен статистикалық деректер мен екінші тоқсандағы корпоративтік есеп беру маусымының сәтті басталуы аясында өсім көрсетті.
LSEG дерегіне сәйкес, сарапшылар S&P 500 индексіне кіретін компаниялардың екінші тоқсандағы пайдасы өткен жылдың сәйкес кезеңімен салыстырғанда орта есеппен 23,7 пайызға артады деп күтуде.
АҚШ Еңбек министрлігінің мәліметінше, маусым айында өндірушілер бағасының индексі (PPI) жылдық есепте 5,5 пайызға өсті. Бұл мамырдағы 6 пайыздық көрсеткіштен төмен.
Айлық есепте PPI 0,3 пайызға төмендеді. Бұл – 2025 жылдың тамызынан бергі алғашқы төмендеу әрі 2025 жылғы сәуірден бергі ең ірі құлдырау. Сарапшылар айлық өзгеріс болмайды деп болжаған.
Сонымен қатар, Нью-Йорк федералдық резерв банкі жариялаған Empire Manufacturing өндірістік белсенділік индексі шілдеде 5,7 пункттен 15,6 пунктке дейін көтерілді. Сарапшылар оның 8,8 пунктке дейін ғана өсетінін күткен.
PayPal Holdings акциялары 17,2 пайызға қымбаттады. Бұған Stripe пен Advent International компаниялары PayPal-ды 53 млрд доллардан астам сомаға сатып алуды ұсынғаны туралы ақпарат себеп болды.
BlackRock акциялары 6,6 пайызға өсті. Активтерді басқару көлемі бойынша әлемдегі ең ірі инвестициялық компания сәуір–маусым аралығында нарық күткеннен жоғары түзетілген пайда мен табыс жариялады.
Morgan Stanley қағаздарының бағасы 0,4 пайызға көтерілді. Банк екінші тоқсанда таза пайдасын 1,6 есе, ал түсімін 27 пайызға арттырып, екі көрсеткіш бойынша да болжамнан асып түсті.
Bank of New York Mellon акциялары да жақсы қаржылық есептің арқасында 5,1 пайызға қымбаттады.
Horizon Investments портфельдік менеджері Майк Диксонның пікірінше, банк секторындағы есептілік өте жақсы нәтиже көрсетіп отыр және бұл тағы бір табысты тоқсан болуы мүмкін.
Lucid Group акциялары бір күн бұрынғы 16 пайыздық төмендеуден кейін 28,8 пайызға күрт өсті. Компания банкроттыққа ұшырауы немесе жекеменшікке өтуі мүмкін деген ақпаратты жоққа шығарды.
Сонымен қатар, Elevance Health акциялары 8,5 пайызға арзандады. Компания биылғы пайда болжамын көтергенімен, ол нарық күткен деңгейден төмен болды.
Johnson & Johnson акциялары компанияның 2026 жылға арналған табыс болжамын жақсартқанына қарамастан 2,7 пайызға төмендеді.
Conagra Brands қағаздарының бағасы 0,4 пайызға төмендеді. Компания төртінші қаржы тоқсанын шығынмен аяқтап, дивиденд көлемін екі есеге қысқартатынын хабарлады.
Жартылай өткізгіш өндірушілердің акциялары да негізінен арзандады. Атап айтқанда, Advanced Micro Devices – 3,5 пайызға, Intel – 4,4 пайызға, Applied Materials – 2,7 пайызға, ал Micron Technology – 8 пайызға төмендеді. Ерекшелік ретінде NVIDIA акциялары 0,3 пайызға өсті.
Сауда қорытындысы бойынша Dow Jones Industrial Average индексі 150,37 пунктке (0,29%) өсіп, 52 658,64 пунктке жетті.
S&P 500 индексі 28,81 пунктке (0,38%) көтеріліп, 7 572,4 пунктті құрады.
Nasdaq Composite индексі 162,22 пунктке (0,62%) өсіп, сауданы 26 269,23 пункт деңгейінде аяқтады.
