Logistan таратқан ақпаратқа сәйкес, Қазақстанның Ауыл шаруашылығы министрлігі басқа мемлекеттерден, оның ішінде Еуразиялық экономикалық одаққа мүше елдерден барлық көлік түрімен бидай әкелуге тыйым салатын бұйрыққа қол қойды. Жаңа шектеулер 27 шілдеден бастап күшіне еніп, алты ай бойы қолданылады. Бұл тыйым транзиттік тасымалдарға, сондай-ақ лицензиясы бар құс фабрикаларына, ұн тарту кәсіпорындарына, астық қабылдау кәсіпорындарына және «Азық-түлік келісімшарт корпорациясы» АҚ-ның атына теміржол арқылы жеткізілетін бидайға қолданылмайды. Қазақстан бұған дейін де ішкі нарықты қорғау және «көлеңкелі» реэкспорттың жолын кесу мақсатында бидай импортына бірнеше рет шектеу енгізген болатын. Мәселен, 2023 жылы республикада автокөлікпен бидай әкелуге тыйым салынса, 2024 жылғы тамыздан 2025 жылғы 1 қаңтарға дейін толық импорттық шектеу күшінде болды.
Еуразия24 пікірі:
Бидай импортына енгізілген шектеудің негізгі мақсаты – ішкі нарықтағы импорттық астық көлемін қысқартып, қазақстандық өндірушілердің өнімін өткізуге қолайлы жағдай жасау. Әсіресе, егін орағы науқаны кезінде мұның маңызы ерекше. Ауыл шаруашылығы өндірушілері үшін бұл шешім тиімді. Сатып алу бағасының жоғары болуы өндіріс шығындарын өтеуге, техникалық паркті жаңартуға және келесі егіс маусымына дайындыққа қосымша қаржы бағыттауға мүмкіндік береді. Дегенмен ішкі нарыққа әсері әркелкі болуы мүмкін. Импорт көлемінің қысқаруы және отандық өндірушілердің бағаның өсуін күтіп, астықты нарыққа шығаруды кешеуілдетуі ұсыныстың азаюына әкелуі ықтимал. Соның салдарынан ұн, нан, макарон өнімдері мен мал азығы сияқты бидайдан өндірілетін тауарлардың бағасы қымбаттау қаупі бар. Бұл, ең алдымен, қазақстандық өндірушілердің импорттың орнын қаншалықты жедел толтыра алатынына және баға өсіміне жол бермеуіне байланысты. Сондықтан биылғы күзде Қазақстанда бидай мен одан өндірілетін өнімдердің бағасы өсуі мүмкін деген болжам жасауға негіз бар.
