Лондон. 20 шілде. ИНТЕРФАКС – Lockheed Martin корпорациясы АҚШ пен Еуропадағы серіктестерімен бірлесіп Patriot зениттік-зымыран кешендеріне (ЗЗК) арналған жаңа тосқауыл зымырандарын әзірлеуді жоспарлап отыр. Financial Times (FT) басылымының хабарлауынша, олардың құны қазіргі үлгілерден екі еседен астам арзан болады.
«АҚШ пен одақтас елдердің қарулы күштеріне ұрыс жағдайында тиімділігі дәлелденген әрі экономикалық тұрғыдан ұтымды шешімдер қажет», – деп келтіреді басылым корпорация өкілі Тим Кэхиллдің Фарнборо халықаралық әуе көрмесінің алғашқы күнінде жасаған мәлімдемесін.
Жобаға сәйкес, жаңа зымыран қазіргі таңда Patriot кешеніне арналған ең заманауи PAC-3 MSE тосқауыл зымыранынан шамамен екі есе арзан болады. Қазіргі үлгінің бір данасының құны шамамен 4 млн АҚШ долларын құрайды.
Сонымен қатар, батыстық бұқаралық ақпарат құралдарының мәліметінше, Еуропаның зымыран жүйелерін әзірлеуші әрі өндіруші MBDA компаниясы дрондар тобын жоюға арналған жаңа тосқауыл зымырандарын әзірлеуді жоспарлап отыр.
Financial Times басылымының атап өтуінше, Украинадағы дағдарыс басталғаннан кейін Patriot кешеніне арналған тосқауыл зымырандарына сұраныс күрт артты. Соның салдарынан әлемдегі бұл оқ-дәрілер қоры айтарлықтай азайды. Сонымен бірге арзанырақ ұшқышсыз ұшу аппараттары мен өзге де зымырандарды жоюға арналған тиімді әрі қолжетімді балама жүйелерді әзірлеуге деген қажеттілік күшейді.
