Дубай. 24 шілде. ИНТЕРФАКС – Сауд Арабиясынан мұнай тиеген Грекияға тиесілі Merbabu танкері Баб-эль-Мандеб бұғазынан сәтті өтті. Бұл туралы жұма күні Bloomberg мониторингтік ресурстардың деректеріне сілтеме жасап хабарлады.
Үндістанға бағыт алған танкер жол бойы өзінің нақты орналасқан жері туралы мәліметті жариялаған жоқ. Бұған дейін ол Қызыл теңізде жүргенін көрсеткенімен, кейін транспондерлерін өшірген. Ал бейсенбі күні кешке кеме Араб теңізінен қайта сигнал берген.
Бұған дейін Баб-эль-Мандеб бұғазынан Аден шығанағына Қытайға тиесілі Xin Long Yang және Cosnew Lake танкерлері өткен. Сондай-ақ Сауд Арабиясының мұнайын тиеген тағы бір қытайлық New Explorer супертанкері де осы бұғазға қарай бет алған.
Жұма күні бұғаздағы кеме қозғалысы жалғасып, бірнеше кеме екі бағытта да өткені хабарланды.
Алайда Bloomberg мәліметінше, хуситтердің қоқан-лоққыларына байланысты Сауд Арабиясының мұнайын тасымалдайтын Батыс елдерінің кемелері ықтимал шабуыл қаупіне тап болуы мүмкін.
Мәселен, Нидерландқа тиесілі Torm Innovation танкері Сауд Арабиясындағы Янбу-әл-Бахр портынан жүк тиегеннен кейін бағытын өзгертіп, Суэц каналына қарай бет алған. Бұған дейін дәл осындай шешімді Кувейтке тиесілі сұйытылған мұнай газын тасымалдайтын Gas King кемесі де қабылдап, қазір Суэц каналы арқылы өтіп жатыр.
Осы аптада хуситтер Йемен порттарына қойылған блокада мен Сана халықаралық әуежайына жасалған шабуылға жауап ретінде Сауд Арабиясына теңіз блокадасын жариялағанын мәлімдеді.
Сейсенбі күні олар бұл блокада тек Сауд Арабиясына тиесілі кемелерге ғана емес, сондай-ақ корольдік порттарына бағыт алған немесе олардан шыққан барлық теңіз көлігіне қатысты екенін хабарлады.
