Астана. 24 шілде. ИНТЕРФАКС-ҚАЗАҚСТАН – 2025 жылдың қорытындысы бойынша Қазақстан мен Өзбекстан арасындағы өзара тауар айналымы 17%-ға өсіп, 4,8 млрд долларға жетті. Бұл 2024 жылғы 4,1 млрд доллармен салыстырғанда жоғары көрсеткіш. Бұл туралы Ақтауда өткен Қазақстан–Өзбекстан арасындағы екіжақты ынтымақтастық жөніндегі Үкіметаралық бірлескен комиссияның 23-отырысының қорытындысы бойынша Қазақстан Республикасы Премьер-министрінің баспасөз қызметі хабарлады.
2026 жылдың алғашқы бес айында екі ел арасындағы тауар айналымы өткен жылдың сәйкес кезеңімен салыстырғанда 37%-ға өсіп, 2,3 млрд долларға жеткен.
Отырыс барысында Қазақстанның Премьер-министрі Олжас Бектенов пен Өзбекстанның Премьер-министрі Абдулла Арипов сауда-экономикалық ынтымақтастықты одан әрі кеңейту мәселелерін талқылады.
Қазір Қазақстан мен Өзбекстан жалпы құны 1,8 млрд доллардан асатын 80 бірлескен жобаны жүзеге асырып жатыр. Оның ішінде құны 227 млн доллар болатын 15 жоба іске қосылып, 5 мыңға жуық жаңа жұмыс орны ашылған. Сонымен қатар жалпы құны 102 млн долларды құрайтын тағы 6 жоба белсенді іске асыру кезеңінде. Бұдан бөлек, жалпы құны 1,5 млрд доллар болатын 59 перспективалы жобаны жүзеге асыру пысықталуда.
Баспасөз қызметінің мәліметінше, 2025 жылдың қорытындысында Қазақстан мен Өзбекстан арасындағы теміржол арқылы жүк тасымалы 16%-ға өсіп, 32,3 млн тоннаға жеткен. Тасымал көлемін одан әрі ұлғайту үшін теміржол дәліздерінің өткізу қабілетін 35 млн тоннадан 60 млн тоннаға дейін арттыру жөніндегі бірлескен іс-шаралар жоспары әзірленген. Сондай-ақ Орталық Азия елдерімен көлік байланысын кеңейту мақсатында шекаралас теміржол учаскелерін жаңғырту және қосымша өткізу бекеттерін ашу ұсынылды.
Автомобиль көлігі саласында E-Permit жүйесі арқылы шетелдік рұқсат бланкілерімен электрондық алмасуға көшу соңғы төрт жыл ішінде олардың санын он еседен астам арттыруға мүмкіндік берген. Соның нәтижесінде мемлекеттік шекарадан өту уақыты 9 сағаттан 30 минутқа дейін қысқарған.
Су шаруашылығы саласында тараптар өзара түсіністік пен екі елдің мүддесін ескеру қағидаттарына сүйене отырып, ынтымақтастықты одан әрі дамытуға дайын екенін растады.
Кездесу қорытындысында Қазақстан мен Өзбекстан үкіметтерінің басшылары Қазақстан–Өзбекстан арасындағы екіжақты ынтымақтастық жөніндегі Үкіметаралық бірлескен комиссияның 23-отырысының хаттамасына қол қойды.
