Zakon.kz хабарлайды: «2026 жылы 21 шілдеде Үкімет қаулысымен азаматтық қызметшілердің, мемлекеттік бюджет қаражаты есебінен ұсталатын ұйымдар қызметкерлерінің және қазыналық кәсіпорындар жұмыскерлерінің еңбегіне ақы төлеу жүйесіне өзгерістер енгізілді. Атап айтқанда, азаматтық қызметшілерге, мемлекеттік бюджет қаражаты есебінен ұсталатын ұйымдар қызметкерлеріне және қазыналық кәсіпорындар жұмыскерлеріне арналған базалық лауазымдық айлықақы мөлшері 17 697 теңге болып белгіленді. Сонымен қатар дене шынықтыру және спорт саласындағы азаматтық қызметшілерге, мемлекеттік бюджет қаражаты есебінен ұсталатын ұйымдар қызметкерлеріне және қазыналық кәсіпорындар жұмыскерлеріне еңбек жағдайына байланысты төленетін қосымша ақылар мен үстемеақыларға да түзетулер енгізілді».
Еуразия24 пікірі:
2026 жылы қалай күн көреміз деп алаңдағандар үшін жағымды жаңалық бар сияқты. Үкімет жаңа қаулы қабылдап, азаматтық қызметшілерге арналған базалық лауазымдық айлықақы мөлшерін қайта бекітті. Жаңа норма 2026 жылғы 3 тамыздан бастап күшіне енеді.
Алайда бұл шешім жұртшылық арасында сұрақ туғызды. Өйткені елімізде ең төменгі жалақы 85 мың теңге болып белгіленген және жұмыс беруші одан төмен еңбекақы төлей алмайды. Ал қаулыда көрсетілген 17 697 теңге бұл сомамен мүлде сәйкес келмейтіндей көрінеді.
Дегенмен, мәселенің мәні басқада. 17 697 теңге – қызметкердің қолына тиетін жалақы емес. Бұл – еңбекақыны есептеуге арналған базалық лауазымдық айлықақы. Яғни мемлекеттік сектордағы жалақыны есептеу кезінде қолданылатын техникалық есептік көрсеткіш. Біздің білуімізше, оның мөлшері 2011 жылдан бері өзгерген жоқ.
Нақты жалақы осы базалық көрсеткішті еңбек өтіліне, атқаратын лауазымына және біліктілік санатына қарай белгіленетін тарифтік коэффициенттерге көбейту арқылы есептеледі. Әдетте мұндай коэффициенттер 3-тен 7-ге дейін, кей жағдайда одан да жоғары болады. Бұған қоса еңбек жағдайына байланысты түрлі үстемеақылар мен қосымша төлемдер қосылады.
Осы тұста заңды сұрақ туындайды: мемлекеттік сектордағы еңбекақы есептеу жүйесін неге бүгінгі өмір сүру деңгейіне бейімдеп қайта қарамасқа? Сонда көпшілікке түсініксіз коэффициенттер, үстемеақылар мен қосымша төлемдердің күрделі жүйесін сақтап отырудың қажеті болмай, бюджет саласы қызметкерлері арасында да артық наразылық туындамас еді.
