Zakon.kz хабарлауынша, ер адам көлік иесі салонда ұйықтап жатқан сәтте оның автокөлігін айдап кетпек болған.
Ақмола облысы Полиция департаментінің мәліметінше, оқиға 2026 жылғы 27 шілдеде тіркелген. Кафеде демалғаннан кейін 26 жастағы Петропавл тұрғыны мас күйінде бөтеннің Changan CS75 Plus көлігінің тізгініне отырған. Ең қызығы, сол кезде көлік иесі алдыңғы жолаушылар орнында ұйықтап жатқан.
Күдікті небәрі 10 метрге жуық жүріп үлгерген. Осы сәтте патрульдік полиция батальонының қызметкерлері көлікті тоқтатқан.
«Аталған факті бойынша қылмыстық іс қозғалды. Ер адамның әрекетіне «Ұрлау мақсатынсыз автокөлікті немесе өзге де көлік құралын заңсыз иелену (айдап әкету)» бабы бойынша құқықтық баға берілді», – деп Zakon.kz Ақмола облысы Полиция департаментіне сілтеме жасап жазды.
Әрине, автокөлікті айдап әкету – өз алдына бөлек құқық бұзушылық. Алайда жарияланған ақпаратта күдіктінің мас күйінде көлік басқарғаны үшін қандай да бір жауапкершілікке тартылғаны туралы мәлімет жоқ. Өйткені ол бөтен көлік болса да, рөлге отырып, шамамен 10 метр жүрген.
Біздің ойымызша, мұндай жағдайда қылмыстық жауапкершілікпен қатар, мас күйінде көлік басқарғаны үшін әкімшілік іс те қозғалуы тиіс. Бұл құқық бұзушылық үшін заңнамада әкімшілік қамаққа алу және жүргізуші куәлігінен айыру сияқты жазалар көзделген.
Бәлкім, Ақмола облысының полициясы мұндай шараларды да қолданған шығар. Тек бұл туралы ресми ақпаратта айтылмаған.
