Астана. 31 шілде. ИНТЕРФАКС — БАӘ-нің Borouge мұнай-химия компаниясы сәуір айында ұшқышсыз ұшу аппараттарының шабуылынан зардап шеккен Ruwais өндірістік кешенінің жұмысын толық қалпына келтірді. Алайда қазіргі уақытта өндіріс көлемі шикізаттың жеткізілуіне байланысты шектеулі болып отыр.
Компанияның хабарлауынша, 2026 жылғы 6 сәуірде Ruwais кешеніндегі өндірістік нысандарда болған оқиғадан кейін зақымданған учаскелердегі жұмыс уақытша тоқтатылған. Маусым айының соңына қарай барлық өндірістік активтердің жұмысы толық қалпына келтірілгенімен, кейінгі кезеңде өндіріс шикізаттың қолжетімділігіне тәуелді болды.
Екінші тоқсанда компания өндірген өнімнің барлығын, сондай-ақ қоймадағы қосымша қорлардың бір бөлігін тұтынушыларға жөнелткен. Осы кезеңде өндіріс көлемі 0,7 млн тонна, ал сатылған өнім көлемі 0,9 млн тоннаны құрады.
Borouge автомобиль, теміржол және теңіз тасымалын қамтитын баламалы логистикалық бағыттарды іске қосқанын мәлімдеді. Соның арқасында компания тоқсан ішінде өндірілген көлемнен де көп өнім жөнелтіп, өңірдегі логистикалық қиындықтарға қарамастан клиенттерге жеткізілімнің үздіксіздігін қамтамасыз еткен.
Екінші тоқсанда кәсіпорынның өндірістік қуаттарды пайдалану деңгейі орта есеппен 60% болды. Бұған сәуірдегі шабуылдан бөлек, Ормуз бұғазының жабылуы да әсер етті. Соның салдарынан экспорттық жеткізілімдер бұзылып, шикізат жеткізушілері өндіріс көлемін уақытша қысқартуға мәжбүр болған.
Компанияның болжамынша, 2026 жылдың екінші жартысында өндірістік қуаттардың жүктелуі Ормуз бұғазы арқылы теңіз қатынасының қалыпты деңгейде қайта жандануына байланысты болады. Сонымен қатар Borouge шикізат жеткілікті болған жағдайда өндіріс пен сатылым көлемін қысқа мерзімде толық қалпына келтіруге дайын екенін атап өтті.
Компанияның бағалауынша, жақын кезеңде өнімнің орташа сату бағасы да, логистикалық шығындар да жоғары деңгейде сақталады.
Еске салсақ, сәуір айында Borouge зауыты әуе шабуылынан кейін кәсіпорын аумағында бірнеше өрт шыққандықтан жұмысын уақытша тоқтатқан болатын. Оқиғаға қатысты ресми мәліметтер жарияланбағанымен, бірқатар бұқаралық ақпарат құралдары сол кезеңде Иранның ұшқышсыз ұшу аппараттары Парсы шығанағы елдеріндегі мұнай өндіру және мұнай-химия нысандарына бірнеше рет шабуыл жасағанын хабарлаған.
