Астана. 31 шілде. ИНТЕРФАКС — Түркиядағы Анталия халықаралық әуежайы тамыз айынан бастап ұйымдасқан туристерді қарсы алу тәртібіне өзгеріс енгізеді. Енді туроператорлар мен қабылдаушы компанияларға атауы мен логотипі көрсетілген жеке тақтайшаларды пайдалануға тыйым салынады. Бұл туралы Ресей туроператорлары қауымдастығы (АТОР) хабарлады.
Жаңа тәртіпке сәйкес, 31 шілде сағат 00:00-ден бастап жолаушылар арнайы әріптермен белгіленген тіркеу нүктелеріне бағытталады. Келу залында туроператорлардың атауы немесе логотипі бар жеке тақтайшаларды қолдануға рұқсат етілмейді.
Әуежайдың жолаушыларды қарсы алу аймағында A-дан M-ге дейінгі әріптермен белгіленген 13 мөлдір ақпараттық стенд орнатылады.
АТОР мәліметінше, туристік агенттіктер осы стендтерге топтастырылған. Әр стендке тоғыз компаниядан бекітіледі. Бір стендте барлығы 54 туристің тегі, яғни әр агенттіктен алты адамның тегі орналастырыла алады.
Сапар алдында туристерге өздері баруы тиіс стендтің әрпі хабарланады. Келу аймағынан шыққан соң жолаушы сол стендтен өзінің тегін тауып, компания өкілі оны трансферлік көлікке дейін алып барады.
Әрбір стендке жауапты туристік агенттіктер бекітіледі. Олар бұл аймақта жеке қарсы алушылардың немесе туристік агенттік мәртебесі жоқ ұйымдардың жұмыс істеуіне жол бермеуге міндетті.
Жаңа талаптардың орындалуын Түркия полициясы мен TURSAB (Түркия туристік агенттіктері қауымдастығы) өңірлік кеңесінің инспекторлары қадағалайды. Ереже бұзылған жағдайда әуежай әкімшілігі тиісті стендке қатысты санкция қолдануы мүмкін.
Еске сала кетейік, биыл мамыр айында Анталия әуежайында жеке трансфер қызметіне де өзгерістер енгізілген болатын. Ол кезде мұндай көліктер әуежай тұрақтарының сыртына шығарылып, компаниялардың логотиптері қойылған арнайы күту орны ұйымдастырылған.
