Астана. 1 тамыз. ИНТЕРФАКС-ҚАЗАҚСТАН – Орталық Азия елдерінің президенттері сенбі күні Қырғызстанның Ыстықкөл жағалауына су-мотор спорты бойынша UIM F1H2O әлем чемпионаты кезеңінің ашылу рәсіміне қатысты. Бұл туралы Қазақстан Президентінің баспасөз қызметі хабарлады.
Орталық Азия мемлекеттерінің басшылары жарысқа қатысушылармен әңгімелесіп, оларға сәттілік тіледі. Сондай-ақ Қазақстан, Қырғызстан, Тәжікстан және Өзбекстан президенттеріне жарысқа қатысатын болид таныстырылды.
Баспасөз қызметінің мәліметінше, кейін Орталық Азия елдерінің көшбасшылары арнайы іске қосу тетігін бір мезгілде басып, UIM F1H2O су-мотор спорты бойынша әлем чемпионатының «Қырғыз Республикасы – Ыстықкөл Гран-приі 2026» кезеңіне ресми түрде старт берді.
Жарысқа Біріккен Араб Әмірліктері, Аустралия, Канада және өзге де мемлекеттердің атынан сынға түсетін сегіз команда мен 18 ұшқыш қатысып жатыр.
Баспасөз қызметінің хабарлауынша, Қырғызстанда алғаш рет ұйымдастырылып отырған бұл Гран-при ел тарихындағы ең ауқымды халықаралық спорттық-мәдени іс-шаралардың біріне айналмақ.
