Рим. 6 тамыз. ИНТЕРФАКС – Италия билігі аптап ыстыққа байланысты елдің 27 ірі қаласында қауіптің ең жоғары деңгейін жариялады. Бұл туралы бейсенбі күні ANSA агенттігі хабарлады.
Агенттіктің мәліметінше, Италия Денсаулық сақтау министрлігі аптап ыстыққа қатысты ескерту жүйесі аясында бақылайтын барлық 27 ірі қалада алғаш рет бір мезгілде ең жоғары – «қызыл» қауіп деңгейі енгізілді. Бұл елді биылғы төртінші аптап ыстық толқынының қамтуымен байланысты.
Хабарламада кей өңірлерде ауа температурасы 40 градус Цельсийге дейін көтерілгені және синоптиктердің болжамынша, мұндай ыстықтың кемінде тағы он күн сақталатыны айтылған.
Ең жоғары қауіп деңгейі Рим, Болонья, Неаполь, Милан, Венеция, Верона, Флоренция, Перуджа, Палермо, Бари сияқты елдің негізгі туристік орталықтарында жарияланды.
ANSA агенттігінің түсіндіруінше, үшінші деңгейдегі «қызыл» ескерту – ұзаққа созылған аптап ыстыққа байланысты төтенше жағдай режимін білдіреді. Мұндай жағдайда денсаулыққа төнетін қауіп жоғары болып, ол тек осал топтарға ғана емес, жас әрі дені сау адамдарға да әсер етуі мүмкін.
Сонымен қатар Батыс ақпарат құралдарының хабарлауынша, Венгрия билігі электр энергиясын үнемдеу мақсатында елдегі бірқатар танымал ғимараттың сыртқы жарығын уақытша өшіру туралы шешім қабылдаған.
Ал Румынияда құрғақшылық пен Дунай өзеніндегі су деңгейінің төмендеуіне байланысты электр энергиясын өндіру көлемі азайған. Осыған байланысты билік Transelectrica компаниясына өнеркәсіптік тұтынушыларға электр жеткізуді кезең-кезеңімен қысқартуға құқық бермек. Бұл туралы тұтынушыларға кемінде 24 сағат бұрын хабарланады.
Румынияның премьер-министрі Илие Боложан әзірге мұндай шараларды қолдану қажеттілігі жоқ екенін, бірақ билік кез келген жағдайға дайын болуы тиіс екенін айтты. Оның сөзінше, ықтимал шектеулер тұрғын үйлерге, ауруханаларға және өзге де маңызды инфрақұрылым нысандарына қолданылмайды.
2026 жылдың жазында Еуропаның бірқатар елі 40 градустан асатын аптап ыстық пен орман өрттеріне тап болды. Соңғы апталарда әсіресе Франция мен Испания қатты зардап шекті.
