Дубай. 6 тамыз. ИНТЕРФАКС – Сауд Арабиясының Қорғаныс министрлігі генерал-майор Абдулла әл-Шехриді өңірдегі кеме қатынасы қауіпсіздігін қамтамасыз ету жөніндегі көпұлтты теңіз коалициясының қолбасшысы етіп тағайындады. Бұл туралы министрліктің мәлімдемесіне сілтеме жасаған Al Arabiya телеарнасы хабарлады.
Министрліктің мәліметінше, әл-Шехри теңіз қорғанысы жөніндегі бірлескен коалицияның қолбасшылығына жетекшілік етіп, оған қатысушы елдер мен өзге де теңіз коалициялары арасындағы жоспарлау және үйлестіру жұмыстарын жүргізуге жауапты болады.
Ведомствоның хабарлауынша, коалицияның негізгі міндеттері – теңіз қауіпсіздігін және кеме қатынасының еркіндігін қамтамасыз ету, теңіз дәліздері мен стратегиялық маңызы бар бұғаздарды қорғау, сондай-ақ халықаралық сауда мен жаһандық жеткізу тізбектерінің қауіпсіздігін сақтау.
Келесі кезеңде, 12–13 тамыз күндері әскери жоспарлаушылардың кездесуі өтеді. Онда коалицияға мүше елдердің бірлескен декларациясы мен жарғысына қол қою алдындағы рәсімдерді аяқтау мәселелері қаралады.
Кейінірек Сауд Арабиясының Қорғаныс министрлігі коалиция құрамына қосылған мемлекеттердің толық тізімін жариялайды.
Бұған дейін Al Arabiya телеарнасы 30 шілдеде Эр-Риядта өткен кездесудің қорытындысы бойынша бастаманы қолдап, бірлескен декларацияға Кувейт, Сомали, Катар, Түркия, Пәкістан, Иордания, Мысыр, Судан және Джибути қол қойғанын хабарлаған болатын.
Өткен аптада Сауд Арабиясы Қызыл теңізде, Аден шығанағында және Баб-эль-Мандеб бұғазында кеме қатынасының қауіпсіздігін қамтамасыз ету мақсатында қорғаныс коалициясын құру бастамасын көтерді. Бұл бағыттар Сауд Арабиясы мен Йемен жағалауы арқылы өтетін халықаралық сауда жолдарының негізгі бөлігі саналады.
Шілде айында хуситтер мен Сауд Арабиясы арасындағы қарулы қақтығыстар қайта жанданды. Шииттік қозғалыс өкілдері Сауд Арабиясы порттарына теңіз блокадасын жариялап, Қызыл теңізде кемінде сегіз саудиялық мұнай танкеріне шабуыл жасады. Кейін олар корольдік аумағындағы мұнай инфрақұрылымы нысандарына соққы бергенін мәлімдеді. Сауд Арабиясы мен арағайындардың хуситтерді әскери әрекеттерді тоқтатуға көндіру әрекеттері әзірге нәтиже берген жоқ.
