«Письма президенту» арнасы хабарлайды: «Алматы облыстық онкологиялық орталығында аурухана палаталарының орнына контейнерлер пайдаланылып отыр. Тағы бір еске сала кетейік, жыл сайын «Әлеуметтік медициналық сақтандыру қоры» КЕАҚ-на халықтың жүздеген миллиард теңге қаражаты түседі».
Еуразия24 пікірі:
Informburo журналистері аталған клиникаға барып, жағдайды өз көзімен көрді. Репортерлер әлеуметтік желідегі жазбасына сілтеме жасаған Facebook қолданушысы Айман Жарылқасымованың контейнерлерге қатысты көтерген мәселесі шындыққа сәйкес келетініне көз жеткізген.
Денсаулық сақтау министрлігі әзірге бұл жағдайға қатысты түсініктеме берген жоқ. Алайда Informburo репортажында клиника басшылығының пікірі келтірілген:
«Клиника басшылығы 31 арнаға контейнерлер ғимараттағы орын тапшылығына байланысты қойылғанын түсіндірді. Соңғы төрт жылда науқастар саны үш есе артқан. Жаңа ғимарат салу бұрыннан жоспарланған, оның жобасын әзірлеу жұмыстары 2022 жылы басталған. Қазір жоба сараптамадан өтіп жатыр, оны қазан айында аяқтау жоспарланып отыр. Құрылыс жұмыстарының нақты қашан басталатыны әзірге белгісіз. Сондықтан клиника алдағы уақытта да науқастардың бір бөлігін контейнерлерде қабылдауға мәжбүр болады».
Бұл – сапалы әрі тиімді емге өзгелерден де көбірек мұқтаж адамдарға жасалып отырған қамқорлықтың нақты көрінісі. Науқастар санының жылдан-жылға артып келе жатқанын көре тұра, төрт жылдың ішінде жаңа ғимараттың жобасын әзірлеу жұмысын да аяқтамау – осы мәселеге жауапты тұлғалардың салғырттығын ғана емес, жағдайға қаншалықты немқұрайды қарағанын көрсетеді.
