Дубай. 22 тамыз. ИНТЕРФАКС – Ирак президенті Низар Амиди ел аумағын басқа мемлекеттерге шабуыл жасау үшін пайдалануға билік жол бермейтінін мәлімдеді.
«Ирак аумағынан қандай да бір мемлекетке шабуыл жасауға жол бермейміз. (…) Қазір барлығы Иракты аймақтағы соғысқа араластырмауға мүдделі», – деді Амиди Бағдадта өткен қауіпсіздік жөніндегі конференцияда. Оның сөзін «Әл-Жазира» телеарнасы таратты.
Президенттің айтуынша, елдегі қарулы топтардың екеуі немесе үшеуі ғана әзірге қаруын тапсырудан бас тартып отыр. Олармен келіссөз жалғасуда. Биліктің ұстанымы бойынша, қарулы күш қолдану құқығы тек мемлекеттік құрылымдарға тиесілі болуы керек.
Амиди бұл қағидат Ирак Конституциясында бекітілгенін және оны елдің діни қайраткерлері де қолдайтынын атап өтті.
Президент Ормуз бұғазындағы кеме қатынасының тоқтауы Иракқа ғана емес, бүкіл әлемге әсер ететінін айтты. Бағдад осы мәселе бойынша Иранмен келіссөз жүргізіп жатыр. Амидидің мәліметінше, Ирак мұнайын тасымалдаған бірнеше кеменің Ормуз бұғазы арқылы өтуіне мүмкіндік туған.
Бір күн бұрын Ирак премьер-министрі Әли аз-Зейди үкіметке бағынбайтын кейбір қарулы құрылымдардың қаруын тапсырып, «Халықтық жұмылдыру күштері» құрамына кіргенін мәлімдеген еді. Қалған топтармен келіссөз әлі жалғасуда. Сонымен бірге қаруды тапсыру тәртібі әзірленіп жатыр.
Шілде айының соңында Сауд Арабиясының Қорғаныс министрлігі Ирак аумағынан ұшырылған дрондардың әуеде жойылғанын хабарлады. Ұшқышсыз аппараттар корольдіктің Шығыс провинциясындағы мұнай нысандарына бағытталған. Осыдан кейін Сауд Арабиясының қарулы күштері АҚШ Қарулы күштерінің Орталық қолбасшылығымен бірлесіп, Ирактағы Иран қолдайтын қарулы топтардың нысандарына соққы жасады.
Бұған жауап ретінде «Ирак исламдық қарсыласу қозғалысы» Бағдад билігінен Эр-Риядқа қатысты шара қабылдауды талап етіп, оған бір апта мерзім берген. Талап орындалмаса, қозғалыс өз бетінше әрекет ететінін ескертті. Белгіленген уақыт аяқталғаннан кейін Ирак билігі әскер мен қауіпсіздік қызметтерін күшейтілген тәртіпке көшірді. Алайда жағдай одан әрі ушыққан жоқ.
