Астана. 28 тамыз. ИНТЕРФАКС-ҚАЗАҚСТАН – Қазақстан Халық кеңесі қыркүйектің екінші жартысында жасақталады. Бұл туралы Қазақстан Президенті Қасым-Жомарт Тоқаев мәлімдеді.
«Қыркүйектің екінші жартысында Қазақстан Халық кеңесі құрылады. Бұл – еліміздің тарихында алғаш рет құрылғалы отырған жоғары консультативтік орган. Оның құрамында Қазақстандағы этностық, өңірлік, әлеуметтік және қоғамдық-саяси әралуандық кеңінен қамтылады. Шын мәнінде, бұл – бірегей орган», – деді Тоқаев жұма күні Астанада Құрылтайдың алғашқы сессиясының ашылуында.
Мемлекет басшысы Халық кеңесінің Конституцияға сәйкес заң шығару бастамасын көтеруге құқығы барын еске салды.
Қазақстанда жаңа Конституция күшіне енгеннен кейін бұрынғы Қазақстан халқы Ассамблеясының орнына жаңа жоғары консультативтік орган – Халық кеңесі құрылатын болды. Оның құрамына елдегі түрлі этнос өкілдері енеді. Кеңес 126 мүшеден тұрады: 42 адам этномәдени бірлестіктерден, 42 адам ірі қоғамдық бірлестіктерден, тағы 42 адам мәслихаттар мен өңірлік қоғамдық кеңестерден ұсынылады.
Халық кеңесінің барлық мүшесін Президент тағайындайды, ал төрағаны кеңес мүшелері өз арасынан сайлайды.
15 наурызда өткен референдумда қабылданған Қазақстанның жаңа Конституциясы 2026 жылы 1 шілдеде күшіне енді.
