Астана. 28 тамыз. ИНТЕРФАКС-ҚАЗАҚСТАН – БҰҰ Қауіпсіздік Кеңесі әлемдегі және жекелеген өңірлердегі бейбітшілік пен қауіпсіздікті қамтамасыз ету жөніндегі міндетін атқаруды тоқтатты, ал ірі мемлекеттер арасында өзара сенім жоғалды. Бұл туралы Қазақстан Президенті Қасым-Жомарт Тоқаев мәлімдеді.
«Әлемде бұрын-соңды болмаған оқиғалар бірінен соң бірі қарқын алып, жүйесіз, ретсіз әрі болжауға қиын сипатқа ие болды. Бұл дүрбелең іс жүзінде барлық елдер мен халықтарды қамтыды. Мемлекеттер, әсіресе ірі державалар бір-біріне сенуден қалды деуге болады. Мұның салдары БҰҰ мен оның институттарының жұмысына кері әсер етті. БҰҰ Қауіпсіздік Кеңесі өзіне жүктелген жаһандық және өңірлік бейбітшілікті, тұрақтылық пен қауіпсіздікті қамтамасыз ету міндетін атқаруды тоқтатты», – деді Тоқаев жұма күні бірінші шақырылымдағы Құрылтайдың алғашқы сессиясын ашу барысында.
«Осындай күрделі жағдайда өңірлік халықаралық ұйымдардың маңызы артып, олар халықаралық қатынастарда алдыңғы қатарға шыға бастады. Сонымен бірге әлемдік аренада «орта державалар» деп аталатын мемлекеттердің де салмағы арта түсті. Қазақстан да осы санатқа жатады», – деді Президент.
Мемлекет басшысы әлемдегі тұрақсыздықпен қатар кейінгі жылдары тағы бір жаңа үрдіс күшейгенін атап өтті. Цифрлық технологиялар мен жасанды интеллект аса жылдам дамып келеді.
«Бұл үдерістің түпкі, тіпті аралық нәтижелерінің өзі әлі де көп пікірталас тудырады. Кейде оның салдары осы технологияларды жасап жатқан мамандардың өзіне де толық түсінікті емес. Мәселен, таяу болашақта ядролық қарудың орнын жасанды интеллект құралдары басуы мүмкін деген болжам айтылып жүр», – деді Тоқаев.
Президенттің пікірінше, мұның бәрі қазіргі әлемдегі өзгерістердің белгілі бір қалыпқа бағынбай, барған сайын болжап болмайтын сипат алып бара жатқанын көрсетеді. Ал оның салдары болашақ ұрпақ үшін аса ауыр болуы мүмкін.
