Астана. 28 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Құрылтайдың мүмкіндігі шектеулі балаларды қолдауға және 16 жасқа толмағандардың әлеуметтік желілерде тіркелуіне тыйым салуға қатысты бірқатар заң қабылдауы қажет екенін мәлімдеді.
«Құрылтай бұрынғы қос палаталы Парламент депутаттары қарап үлгермеген бірқатар заң жобасын да қабылдауы керек», – деді Тоқаев жұма күні бірінші шақырылымдағы Құрылтайдың алғашқы сессиясын ашу барысында.
Президенттің айтуынша, мүмкіндігі шектеулі балаларды жан-жақты қолдауға арналған заң әзірлеуге ерекше назар аудару қажет.
«Бұл мәселені Бурабайда өткен Ұлттық құрылтай отырысында көтердім. Мұндай балаларға нақты әрі тиімді көмек көрсететін жүйе құруымыз керек. Олардың сапалы білім алуына қажетті жағдай жасалуға тиіс. Сонымен қатар медициналық және әлеуметтік қызмет көрсету сапасын арттыру қажет», – деді Мемлекет басшысы.
Оның пікірінше, балаларға арналған осындай орталықтар барлық облыс орталықтары мен ірі аудандарда ашылуы керек.
«Бұл игі іске демеушілер де атсалысады деп сенемін. Мемлекет қамқорлыққа шынымен мұқтаж әрбір азаматқа қолдау көрсетуге тиіс. Бұл – менің берік ұстанымым. Жалпы, өскелең ұрпақтың жайлы әрі, ең бастысы, қауіпсіз ортада өмір сүруіне барлық жағдайды жасауға міндеттіміз», – деді Тоқаев.
Президент Үкіметтің 16 жасқа толмаған балалардың әлеуметтік желілерде тіркелуіне заң жүзінде тыйым салуды ұсынғанын еске салды.
«Жуырда өткен Тамыз конференциясында бұл мәселеге егжей-тегжейлі тоқталдым. Мұндай шаралар көптеген елде қолға алынып жатыр. Мен бұл бастаманы қолдаймын. Сондықтан оны бірінші кезекте қарау қажет деп санаймын», – деді Мемлекет басшысы.
Сонымен бірге Тоқаев заң жобасын қабылдамас бұрын оның іс жүзінде қалай орындалатынын қамтамасыз ететін тетіктерді алдын ала жан-жақты пысықтау керектігін айтты. Өйткені қабылданған заң қағаз жүзінде қалып қоймауға тиіс.
Бұдан бөлек, президент энергетика саласының технологиялық тұрақтылығын қамтамасыз етуге және баламалы энергия көздерін дамытуға бағытталған заң жобаларын қарауды жеделдету қажет екенін атап өтті.
«Онлайн-платформалар мен бұқаралық ақпарат құралдарының қызметін реттейтін заңдарға да ерекше назар аудару керек. Ақпарат кеңістігінде азаматтардың құқықтары мен заңды мүдделерін қорғау үшін қосымша шаралар қабылдау қажет», – деді Тоқаев.
