Астана. 29 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ядролық сынақтарға қарсы халықаралық іс-қимыл күніне және Семей ядролық полигонының жабылғанына 35 жыл толуына орай Қазақстан халқына үндеу жасады, деп хабарлады Мемлекет басшысының баспасөз қызметі.
Тоқаев бүгін әлем жұртшылығы Қазақстанның бастамасымен БҰҰ Бас Ассамблеясы бекіткен Ядролық сынақтарға қарсы халықаралық іс-қимыл күнін атап өтіп жатқанын еске салды.
«Осыдан тура 35 жыл бұрын халықаралық ахуал күрделі кезеңде Семей ядролық полигоны жабылды. Ондаған жыл бойы жүргізілген сынақтар адам денсаулығы мен қоршаған ортаға орны толмас зардап әкеліп, халқымыздың тағдырында өшпес із қалдырды. Бұл күн ядролық сынақтардың қасіретті салдарын бүкіл адамзаттың есіне салып, мұндай жағдайдың енді қайталануына жол бермеуге үндейді», – делінген Президент үндеуінде.
Әлемдегі көлемі жағынан төртінші ядролық арсеналдан өз еркімен бас тартқан Қазақстан бейбітшілік, қауіпсіздік пен орнықты дамуды таңдады.
«Жаңа Конституцияның кіріспесінде бекітілген барлық мемлекетпен бейбіт әрі достық қарым-қатынас орнатуға деген ұмтылыс Қазақстанның сыртқы саясатындағы айнымас қағида болып қала береді. Әлемдік антиядролық қозғалыстың белсенді көшбасшыларының бірі ретінде еліміздің ұстанымы өзгермейді. Біз ядролық державаларды келіссөз жүргізуге, Ядролық сынақтарға жаппай тыйым салу туралы шарттың тезірек күшіне енуіне және ядролық қаруды қолдану қаупін жою үшін халықаралық қауымдастықты бірлесіп, батыл әрекет етуге шақырамыз», – деді Қазақстан Президенті.
Мемлекет басшысы атом энергиясы тек бейбіт әрі жасампаз мақсаттарға қызмет етуге тиіс екенін атап өтті.
1949 жылдан бері жұмыс істеген Семей ядролық полигоны 1991 жылғы 29 тамызда жабылды.
