Астана. 31 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ерлан Қаринді республика вице-президенті қызметіне тағайындады, деп хабарлады Мемлекет басшысының баспасөз қызметі.
«Қарин Ерлан Тынымбайұлы бұрын атқарған лауазымынан босатылып, Қазақстан Республикасының Вице-Президенті болып тағайындалсын», – делінген Президент Жарлығында.
Дүйсенбі күні бұған дейін Құрылтай Ерлан Қаринді Қазақстанның вице-президенті қызметіне тағайындауға келісім берген болатын.
50 жастағы Ерлан Қарин осыған дейін Президент Әкімшілігі басшысының бірінші орынбасары қызметін атқарды. Әр жылдары Мемлекет басшысының кеңесшісі, көмекшісі және Мемлекеттік хатшы болды.
Қазақстанда референдумда қабылданған жаңа Конституция 2026 жылғы 1 шілдеде күшіне енді. Негізгі өзгерістердің бірі – Қазақстанның вице-президенті лауазымының енгізілуі.
Конституцияға сәйкес, вице-президентті Құрылтай депутаттарының жалпы санының көпшілік даусымен берілген келісім негізінде Мемлекет басшысы тағайындайды.
Вице-президент Құрылтаймен, Үкіметпен және өзге де мемлекеттік органдармен өзара іс-қимыл барысында Президенттің атынан өкілдік етеді. Сондай-ақ Мемлекет басшысы белгілейтін өзге де өкілеттіктерді жүзеге асырады.
Президент өкілеттігі мерзімінен бұрын тоқтатылған немесе Мемлекет басшысы қайтыс болған жағдайда, президент сайлауы өткенге дейін оның өкілеттігі вице-президентке өтеді.
