АСТАНА. 3 қыркүйек. ИНТЕРФАКС-ҚАЗАҚСТАН — Қазақстанда бейсенбі күні бір палаталы Парламент — Құрылтай сайлауынан кейін Премьер-министр Олжас Бектенов басқаратын Үкіметтің жаңа құрамын жасақтау аяқталды.
ПРЕМЬЕР ҚЫЗМЕТІНДЕ ҚАЛДЫ
Конституцияға сәйкес, Қазақстан Үкіметі жаңадан сайланған Құрылтай алдында өкілеттігін тоқтатады. Құрылтайға алғашқы сайлау 23 тамызда өтіп, оның бірінші сессиясы 28 тамызда ашылды.
31 тамызда Қасым-Жомарт Тоқаев Құрылтайдың келісімін алғаннан кейін Олжас Бектеновті қайтадан Премьер-министр қызметіне тағайындады. Осылайша, Үкіметті 2024 жылғы ақпаннан бері басқарып келе жатқан 45 жастағы Бектенов орнында қалды.
Бұл шешім тосын болған жоқ. Өйткені Мемлекет басшысы Үкімет жұмысына бұған дейін-ақ оң баға берген еді.
Қайта тағайындаудан бір апта бұрын Тоқаев Бектенов басқаратын Үкіметтің «жеткілікті табанды жұмыс істеп, Мемлекет басшысы қойған міндеттерді жедел орындайтынын» атап өткен. Сондай-ақ Үкімет жұмысына алаңдауға негіз жоқ екенін айтқан.
ЖАҢА ЕСІМДЕР КІМДЕР?
Бейсенбі күні Министрлер кабинетінің жаңа құрамын жасақтау толық аяқталды. Құрылтайдың бейінді комитеттері бірқатар үміткерді қарап, оларды министр қызметіне тағайындауға келісім берді. Бұдан кейін Президент тиісті жарлықтарға қол қойды.
Үкімет құрамына төрт жаңа тұлға енді. Маңғыстау облысының Төтенше жағдайлар департаментін басқарған Мұрат Мұханов Төтенше жағдайлар министрі болды. Сыртқы істер министрінің орынбасары қызметін атқарған Әлібек Қуантыров Экология және табиғи ресурстар министрі болып тағайындалды. Президенттің көмекшісі Арман Қырықбаев Мәдениет және ақпарат министрі қызметіне келді. Ал 2019–2023 жылдары Сыртқы істер министрлігін басқарған Мұхтар Тілеуберді қайтадан осы ведомствоның басшысы болып тағайындалды.
ВИЦЕ-ПРЕМЬЕРЛЕР
Қазақстандағы алты вице-премьердің бесеуі жаңа Үкімет құрамында қызметін сақтап қалды.
Президент жарлығымен Нұрлыбек Нәлібаев Премьер-министрдің бірінші орынбасары болып қайта тағайындалды. Серік Жұманғарин Премьер-министрдің орынбасары — Ұлттық экономика министрі, Жаслан Мәдиев Премьер-министрдің орынбасары — Жасанды интеллект және цифрлық даму министрі, Ғалымжан Қойшыбаев Премьер-министрдің орынбасары — Үкімет аппаратының басшысы, Қанат Бозымбаев Премьер-министрдің орынбасары қызметінде қалды.
Ал бұған дейін алтыншы вице-премьер болған Аида Балаева Мәдениет және ақпарат министрі қызметін де қатар атқарып келген еді. Президент жарлығымен ол бұл қызметтерден босатылып, Қауіпсіздік Кеңесі төрағасының орынбасары болып тағайындалды.
Әзірге Үкімет құрамындағы өзге министрлердің ешқайсысына вице-премьер мәртебесі қоса берілген жоқ. Осылайша, әлеуметтік саланы үйлестіретін Премьер-министр орынбасарының қызметі бос тұр.
НЕГІЗГІ ҚҰРАМ САҚТАЛДЫ
Жаңа Үкіметте министрлердің басым бөлігі өз қызметінде қалды. Қаржы министрі Мәди Тәкиев, Көлік министрі Нұрлан Сауранбаев, Әділет министрі Ерлан Сәрсембаев, Энергетика министрі Ерлан Ақкенженов, Өнеркәсіп және құрылыс министрі Ерсайын Нағаспаев, Оқу-ағарту министрі Жұлдыз Сүлейменова, Сауда және интеграция министрі Арман Шаққалиев қайта тағайындалды.
Сондай-ақ Су ресурстары және ирригация министрі Нұржан Нұржігітов, Денсаулық сақтау министрі Ақмарал Әлназарова, Еңбек және халықты әлеуметтік қорғау министрі Асқарбек Ертаев, Ауыл шаруашылығы министрі Айдарбек Сапаров, Туризм және спорт министрі Ербол Мырзабосынов, Ғылым және жоғары білім министрі Саясат Нұрбек те қызметін жалғастырады.
Қорғаныс және ішкі істер министрлері де орнында қалды. Тоқаев Дәурен Қосановты Қорғаныс министрі, Ержан Сәденовті Ішкі істер министрі қызметіне қайта тағайындады.
