АСТАНА. 3 қыркүйек. ИНТЕРФАКС-ҚАЗАҚСТАН — Олжас Бектенов басқаратын Қазақстан Үкіметінің жаңа құрамында алты вице-премьердің бесеуі қызметін сақтап қалды.
Мемлекет басшысының жарлығымен Нұрлыбек Нәлібаев Премьер-министрдің бірінші орынбасары, Серік Жұманғарин Премьер-министрдің орынбасары — Ұлттық экономика министрі, Жаслан Мәдиев Премьер-министрдің орынбасары — Жасанды интеллект және цифрлық даму министрі, Ғалымжан Қойшыбаев Премьер-министрдің орынбасары — Үкімет аппаратының басшысы, Қанат Бозымбаев Премьер-министрдің орынбасары қызметіне қайта тағайындалды.
Бұған дейін алтыншы вице-премьер қызметін Аида Балаева атқарған. Ол бұл қызметті Мәдениет және ақпарат министрі лауазымымен қатар алып жүрген. Мемлекет басшысының жарлығымен Балаева аталған қызметтерден босатылып, Қазақстан Қауіпсіздік Кеңесі төрағасының орынбасары болып тағайындалды.
Қазақстан Үкіметі 28 тамызда жаңадан сайланған Құрылтай алдында өкілеттігін тоқтатып, жаңа құрам бекітілгенге дейін міндеттерін атқаруды жалғастырды. 31 тамызда Қазақстан Президенті Қасым-Жомарт Тоқаев Құрылтайдың келісімін алғаннан кейін Олжас Бектеновті Премьер-министр қызметіне тағайындады. Осылайша, Үкіметті 2024 жылғы ақпаннан бері басқарып келе жатқан 45 жастағы Бектенов қызметінде қалды.
