ДУБАЙ. 4 қыркүйек. ИНТЕРФАКС — Йеменнің үкімет әскері елдің оңтүстік-батысындағы Таиз провинциясында бірқатар аумақты хуситтерге беріп қойды. Бұл аймақта түні бойы шайқас жүрді, деп хабарлады «Әл-Жазира» телеарнасы.
Телеарна мәліметінше, үкімет әскері Таизге және одан батысқа қарай орналасқан Моха портты қаласына жүк жеткізетін негізгі жолға қауіп төніп тұр. Егер хуситтер негізгі жабдықтау жолын кесіп тастаса, портты да басып алуға әрекет жасауы мүмкін, деп есептейді сарапшылар.
Сонымен қатар «Анадолу» агенттігінің хабарлауынша, үкіметті қолдайтын Ұлттық қарсыласу күштері стратегиялық маңызы бар жағалаудағы Ходейда провинциясының оңтүстігінде хуситтермен кескілескен шайқас жүргізіп жатыр.
Өз кезегінде үкімет әскері Йеменнің солтүстігіндегі Әл-Джауф провинциясында хуситтердің позицияларына тұтқиылдан шабуыл жасап, олардың күштері шоғырланған аумақтар мен қару-жарақ қоймаларына соққы берді. Әскерилер реактивті снарядтар мен дрондарды қолданды.
Йемендегі қақтығыс 2014 жылы басталды. 2022 жылдан бері елде салыстырмалы тыныштық сақталған еді. Алайда шілде айының басынан үкімет әскері мен хуситтер арасындағы шайқастар елдің бірқатар өңірінде қайта күшейді. Олардың қатарында Йеменнің орталығындағы Мариб, солтүстігіндегі Әл-Джауф, оңтүстік-батысындағы Ад-Дали мен Таиз провинциялары бар.
Бұған қоса, шілде айында хуситтер Йемен порттарының қоршауға алынуына және Сана халықаралық әуежайына жасалған шабуылға жауап ретінде Сауд Арабиясына теңіз блокадасын жариялады. Ол Сауд Арабиясының порттарына бағыт алған және олардан шыққан барлық теңіз көлігіне қатысты. Хуситтердің әрекетінен Сауд Арабиясы кемелерінің Баб-эль-Мандеб бұғазы арқылы өтуі айтарлықтай қиындады.
