ВАШИНГТОН. 7 қыркүйек. ИНТЕРФАКС — Майами халықаралық әуежайында Amazon компаниясына жүк тасымалдайтын ұшақ қону кезінде ұшу-қону жолағынан шығып кетіп, өртенді. АҚШ БАҚ-тарының хабарлауынша, кемінде бес адам қаза тапқан.
Тағы бес адам зардап шекті. Майами-Дейд округінің өрт сөндіру және құтқару қызметінің басшысы Райед Джадаллахтың айтуынша, олардың үшеуінің жағдайы ауыр.
Алдын ала мәлімет бойынша, ұшақ қонуға бет алған кезде ұшу-қону жолағынан шығып кетіп, бірнеше автокөлікке соғылған. Артынша өрт шыққан. Бірнеше адам көліктердің ішінде қалып қойған.
АҚШ Федералдық авиация басқармасының (FAA) мәліметінше, 21 Air әуе компаниясының 7598-рейсін орындаған ұшақ жергілікті уақытпен шамамен сағат 14:00-де (Мәскеу уақытымен 21:00) ұшу-қону жолағынан шығып кеткен. Ұшақ Пуэрто-Рикодан ұшып келген.
Amazon компаниясы Майами әуежайындағы оқиға салдарынан бес адамның қаза тапқанына байланысты көңіл айтты.
«Бүгін Майами халықаралық әуежайында болған оқиғадан бес адамның қаза тапқанын зор күйзеліспен қабылдадық», — деп компания мәлімдеді.
Amazon оқиғаның мән-жайын анықтау үшін жергілікті билік өкілдерімен бірлесіп жұмыс істеп жатқанын хабарлады.
АҚШ-тың Көлік қауіпсіздігі жөніндегі ұлттық кеңесі (NTSB) апаттың себебін анықтау үшін Майамиге арнайы мамандар жібермек. Тергеу тобына кеңес төрағасы Дженнифер Хоменди жетекшілік етеді.
21 Air — Майамиде операциялық орталығы бар жүк тасымалдаушы әуе компаниясы. Компания Amazon және DHL тапсырыстары бойынша Boeing 767 ұшақтарымен жүк тасымалдайды.
