Дубай. 19 қыркүйек. ИНТЕРФАКС – Пәкістан Премьер-министрінің орынбасары, Сыртқы істер министрі Исхак Дар Иран Сыртқы істер министрі Аббас Аракчимен телефон арқылы сөйлесіп, энергия ресурстарын жеткізу мен теңіз арқылы жүк тасымалына кедергі келтірмеу қажеттігін айтты. Бұл туралы Dawn басылымы Пәкістан СІМ мәлімдемесіне сүйеніп хабарлады.
«Дар энергия ресурстарының үздіксіз жеткізілуі мен кемелердің қауіпсіз әрі жедел өтуінің маңызын атап өтті. Бұл мәселелер әсіресе дамушы елдер мен жаһандық жеткізу тізбектеріне тікелей әсер етеді», – делінген хабарламада.
Пәкістан СІМ басшысы өңірдегі жағдайды тұрақтандырудың жалғыз жолы – диалог пен дипломатия екенін айтты. Дар мен Аракчи келесі аптада Нью-Йоркте өтетін БҰҰ Бас Ассамблеясының саммиті аясында кездесуге келісті.
Сенбі күні Пәкістан СІМ Тегеран мен Вашингтон арасындағы байланыстарға арағайын болып отырғанын да мәлімдеді. Исламабад тараптар арасындағы келіспеушіліктерді реттеп, АҚШ пен Иранның өзара түсіністік туралы меморандумына қайта оралуына ықпал етуге күш салып жатыр.
Өңірдегі кеме қатынасына қатысты алаңдаушылық хуситтер бір апта бұрын Йеменнің Қызыл теңізге шығатын жағалау бөлігін және Баб-эль-Мандеб бұғазын бақылауға алғаннан кейін күшейді. Қазір хуситтер енгізген шектеу тек Сауд Арабиясының кемелеріне қатысты.
Сонымен қатар өткен дүйсенбіге жоспарланған Иран мен Парсы шығанағы елдерінің кездесуі өтпей қалды. Тараптар онда Ормуз бұғазындағы дағдарысты реттеу мәселесін талқылауы тиіс еді.
