Брюссель. 22 қыркүйек. ИНТЕРФАКС – Еурокомиссия (ЕК) энергия ресурстарының үздіксіз жеткізілуі мен олардың бағасына қатысты ахуалды жіті бақылап, жағдайдың ықтимал даму сценарийлерін қарастырып отыр. Бұл туралы ЕК-нің ресми өкілі Анна-Кайса Итконен мәлімдеді.
«Басты қорытынды мынадай: қазба отын импортына тәуелді болып отырған кезде энергия бағасының тұрақсыздығы сақталады. Қазіргі энергетикалық дағдарыс пен одан шығу жолдарын талқылағанда өзара байланысты болғанымен, мәні жағынан екі бөлек мәселені шешуге тура келеді. Біріншісі – Ормуз бұғазындағы жағдайдан туындаған қазба отын бағасының қазіргі жаһандық дағдарысы», – деді Итконен сейсенбі күні Брюссельде өткен брифингте.
Оның айтуынша, қазіргі ахуал 2022 жылғы газ тапшылығы кезінде қалыптасқан жағдайдан өзгеше.
«Ол кезде дағдарыс негізінен Еуропаны қамтыды. Яғни қазба отынға қатысты мәселені Еуропаның өзінде шешуге тура келді. Қазір жағдай мүлде басқа және оған тиісінше басқа шаралар қажет. Қазба отын бағасының қымбаттауы бүгінде бүкіл әлемді қамтып отыр», – деді ЕК өкілі.
Итконен Еуропада энергия бағасы АҚШ пен Қытайға қарағанда орта есеппен екі-үш есе жоғары екенін еске салды. Еурокомиссия ЕО-ға мүше елдермен бірлесіп, қалыптасқан жағдайдан шығудың жолдарын іздестіріп жатыр.
«Газ бен мұнай жеткізілімдерін үйлестіру топтары қазір тұрақты түрде бас қосып жүр. Қандай шешім қажет екенін анықтау үшін мүше мемлекеттердегі жағдайды толық білуіміз аса маңызды. Соның ішінде бірлескен шаралар қазіргі қиындықты жеңілдете ала ма, соны да бағалау қажет. Өйткені бұл дағдарыстың 2022 жылғы жағдайдан айырмашылығы елеулі», – деді Итконен.
ЕК өкілінің айтуынша, екінші мәселе Еуропаның өз ішіндегі энергия бағасының ұзақ уақыт бойы жоғары болып отырғанына байланысты. Осы орайда Accelerate EU жоспары мен электрлендіру жөніндегі іс-қимыл жоспарына ерекше мән беріліп отыр.
«Біз экологиялық таза энергия көздері баға жағынан ең қолжетімді екенін үнемі айтып келеміз. Орта мерзімді кезеңде бағаның құбылуына тәуелділікті азайтудың бірден-бір жолы да – осы», – деді ол.
Франция президенті Эмманюэль Макронның Еурокомиссия төрағасы Урсула фон дер Ляйенге жолдаған, ЕО-ның отын нарығына қатысты кейбір талаптарын жеңілдетуді ұсынған хаты туралы сұраққа Итконен Еурокомиссия бұл ұсыныстарды мұқият зерделеп жатқанын айтты.
«Біз мүше мемлекеттермен тығыз жұмысты жалғастырып жатырмыз. Газ жеткізілімдерін үйлестіру тобының кезекті отырысы осы бейсенбіде өтеді. Онда қазіргі жағдай бағаланады. Мүше мемлекеттер ахуал жөніндегі соңғы мәліметтерді ұсынады, ал бұл мәселені шешудің неғұрлым тиімді жолдарын айқындауға мүмкіндік береді», – деді ЕК өкілі.
