Мәскеу. 22 қыркүйек. ИНТЕРФАКС – АҚШ әскери қысымды бәсеңдетуге алғашқы қадам жасаса, Иран Ормуз бұғазын жеті күн ішінде ашуға дайын. Бұл туралы жапондық Kyodo News агенттігі Иранның жоғары лауазымды шенеунігіне сілтеме жасап хабарлады.
Оның айтуынша, Тегеран бұл жөніндегі ұсынысын араағайын елдер арқылы Вашингтонға жеткізген.
Иран АҚШ-пен арадағы қақтығысты біржола тоқтату үшін келіссөздерді қайта бастауды ұсынды. Тегеран осы аптада өтетін БҰҰ Бас Ассамблеясының сессиясын араағайын елдермен кеңесу үшін пайдаланбақ.
Kyodo дереккөзінің айтуынша, БҰҰ Бас Ассамблеясы аясында Иран президенті Масуд Пезешкиан мен АҚШ президенті Дональд Трамптың кездесуі жоспарланып отырған жоқ. Дегенмен Вашингтон бейбіт келісімге келуге «шын ниеті мен табандылығын» танытса, бұл бағытта ілгерілеу болуы мүмкін.
Шенеуніктің сөзінше, Тегеран Вашингтоннан келіссөздерді қайта бастауға әзір екенін білдіретін нақты қадам күтеді. Соның ішінде Иран порттарының әскери қоршауын тоқтату және Ормуз бұғазына қатысты әскери операцияларды доғару жөнінде шаралар қабылдануы тиіс.
Егер АҚШ осындай қадамдарға барса, Иран Ормуз бұғазын жеті күннен кешіктірмей ашып, келіссөз үстеліне қайта отыруға дайын, деді ол.
Осы хабардан кейін мұнай бағасы төмендей бастады. Мәскеу уақытымен сағат 13:11-де Лондонның ICE Futures биржасында Brent маркалы мұнайдың қараша айына арналған фьючерстері барреліне $97,67 болды. Бұл алдыңғы сауда қорытындысындағы бағадан $2,68-ға немесе 2,67%-ға төмен.
Нью-Йорк тауар биржасының (NYMEX) электрондық саудасында WTI мұнайының қазан айына арналған фьючерстері Мәскеу уақытымен сағат 13:01-де $3-ға немесе 3,13%-ға арзандап, барреліне $92,78-ға түсті. Саудасы белсендірек жүріп жатқан қараша фьючерстері сағат 13:11-де $2,94-ға немесе 3,18%-ға төмендеп, барреліне $89,43 болды.
