Брюссель. 22 қыркүйек. ИНТЕРФАКС – G7 елдерінің сыртқы істер министрлері мен Еуропалық одақтың сыртқы істер жөніндегі жоғары өкілі сейсенбі күні Қызыл теңіз бен Баб-эль-Мандеб бұғазындағы еркін кеме қатынасы мен теңіздегі қауіпсіздікке төнген қатерлерді айыптайтын мәлімдеме қабылдады.
Олар өңірдегі тұрақтылық пен қауіпсіздікке, жаһандық энергетикалық қауіпсіздікке, сондай-ақ Қызыл теңіз бен Баб-эль-Мандеб бұғазында кемелердің еркін әрі қауіпсіз жүруіне қатер төндіретін кез келген әрекетке жол беруге болмайтынын мәлімдеді.
«Йеменде және Сауд Арабиясы Корольдігіне қарсы хуситтер жасап жатқан шабуылдарды, соның ішінде бейбіт тұрғындар мен инфрақұрылым нысандарына жасалған, халықтың жағдайын одан әрі қиындатып отырған шабуылдарды қатаң айыптаймыз. Йеменнің заңды үкіметі мен Сауд Арабиясы Корольдігіне толық қолдау білдіреміз. Хуситтерді барлық әскери іс-қимылды дереу тоқтатуға, азаматтық кемелерге қоқан-лоқы жасап, шабуылдаудан бас тартуға және саяси үдеріске шынайы ниетпен қайта оралуға шақырамыз», – делінген құжатта.
Мәлімдемеде Ираннан БҰҰ Қауіпсіздік Кеңесінің 1747, 2140 және 2216 қарарларын бұза отырып, хуситтерге қару-жарақ жеткізуді және оларды қолдауды тоқтату талап етілген. Сыртқы істер министрлерінің пікірінше, хуситтердің әрекеттері жағдайды одан әрі ушықтырып, қақтығыстың күшеюіне, халықаралық саудаға нұқсан келуіне және әлемдік экономикадағы тұрақсыздықтың артуына әкелуі мүмкін.
«Жаһандық жеткізу тізбегінің ұзақ уақытқа бұзылуына жол бермеу үшін бүкіл әлемде теңіздегі қауіпсіздікті және кемелердің еркін қатынауын тұрақты түрде қамтамасыз ету аса маңызды екенін тағы да атап өтеміз. Бұл әсіресе энергия ресурстары, тыңайтқыштар мен азық-түлік жеткізіліміне қатысты. Мұндай тауарларды жеткізудегі ұзақ үзілістер өңірдегі және одан тыс жерлердегі осал экономикасы бар елдер мен халыққа елеулі зардап келтіруі мүмкін», – делінген мәлімдемеде.
