21 қыркүйекте БАҚ-та жылан шаққан балаға дәрігерлер көмектесе алмай жатыр деген ақпарат тарады.
«АЛМАТЫ, біздің қалада сұржылан шаққанда салатын бірде-бір сарысу жоқ екенін білесіздер ме?? Достарымыздың баласын жылан шағып алды. Қазір жансақтау бөлімінде жатыр. Бұл препаратты шұғыл іздеп жатырмыз. Осы жазбаны таратуға көмектесулеріңізді сұраймын. Препарат туралы қандай да бір ақпарат білсеңіздер, кез келген ақшаға сатып алуға дайынбыз. Қазір ең бастысы – баланы аман алып қалу. Алғашқы дозасын Өзбекстаннан жеткізді, бірақ ол жеткіліксіз болды», – деп Newtimes.kz Threads желісіндегі Kukuzhika лақап атымен тіркелген қолданушының жазбасынан үзінді келтіреді.
Эмоцияға толы жазбада Алматы дәрігерлеріне жылан уына қарсы сарысудың жоқтығына байланысты кінә тағылған.
Кейін Tengri Health редакциясы осы жағдайға қатысты Алматы қаласының Денсаулық сақтау басқармасынан түсініктеме алды.
«Алматы қаласының Денсаулық сақтау басқармасының мәліметінше, 19 қыркүйекте 11 жастағы қыз бала тауда серуендеп жүргеннен кейін Алматыдағы Балаларға шұғыл медициналық көмек көрсету орталығына жеткізілген. Ата-анасы баланы нақты қандай жануар немесе жәндік шаққанын анықтай алмаған. Ауруханаға түскен кезде қыздың көз айналасы мен жылан шаққан сол жақ табаны ісінген, сонымен қатар әлсіздік пен ұйқышылдық байқалған. Мамандардың айтуынша, тексеруден кейін науқас жансақтау және қарқынды терапия бөліміне жатқызылған. Дәрігерлер баланы сұржылан шаққанын растамайды, алайда мұндай мүмкіндікті де жоққа шығармайды. Біздің мәліметімізше, Алматыда жылан шағуы мүмкін деген күдікпен тіркелген алғашқы жағдай осы. Белгілері мен ықтимал қауіп ескеріліп, балаға жылан уына қарсы сарысудың бір дозасы егілген. Денсаулық сақтау басқармасы сарысу Өзбекстаннан арнайы алдырылды деген ақпараттың шындыққа жанаспайтынын мәлімдеді. Бала ауруханаға түскен кезде қажетті препарат стационарда болған және қазір де жеткілікті мөлшерде бар», – деп жазады БАҚ қалалық денсаулық сақтау органдарына сілтеме жасап.
Сондай-ақ сарысу егілгеннен кейін баланың жағдайы жақсарғаны хабарланды. Қосымша дозаларды енгізу қажеттілігі медициналық көрсетілімдерге қарай шешіледі.
Бұл жолы жағдай басқаша өрбіді. Әлеуметтік желі қолданушысының жанайқайын орынды, ал келтірген деректерін шындыққа сай деп қабылдауға болар еді. Бірақ кейін автордың бастапқы жазбасы өшірілгені анықталды. Бұл туралы 24.kz хабарлады.
Қазақстанда мұндай жағдайлар жиі кездеседі: азаматтар мәселенің мән-жайын толық анықтамай немесе оның ауқымын асыра бағалап, қоғам назарын аударуға тырысады. Дегенмен мұның да өзіндік себебі бар. Өйткені кейде дәл осындай қоғамдық резонанс шұғыл шешуді қажет ететін мәселелерге жедел назар аудартып, тиісті шаралардың қабылдануына ықпал етеді. Жылан шаққан балаға қатысты жағдайда да осылай болуы әбден мүмкін.
