Almaty Today хабарлайды: ««Алматы Су» мәліметінше, 1 қазаннан бастап Алматыда тұрғындар, бизнес және мемлекеттік ұйымдар үшін су тарифтері өзгереді. Тұрғындар үшін бір текше метр судың бағасы 178,06 теңге, ал кәріз қызметі 119,46 теңге болады. Қосылған құн салығын есептегенде жалпы төлем бір текше метрге 297,52 теңгені құрайды. Бизнес үшін бір текше метр судың тарифі 362,18 теңге, кәріз қызметі 264,75 теңге болады. ҚҚС-ты қосқанда жалпы құны – 626,93 теңге. Мемлекеттік ұйымдар үшін су тарифі бір текше метрге 649,60 теңге, кәріз қызметі 189,14 теңге болып белгіленген. ҚҚС-пен бірге жалпы төлем 838,74 теңгені құрайды».
Еуразия24 пікірі:
Салыстырмалы түрде айтар болсақ, 2025 жылы Алматыда сумен жабдықтаудың орташа тарифі бір текше метрге 135,24 теңге, ал кәріз қызметі 83,54 теңге болған. Екеуін қосқанда – 218,78 теңге. Қазан айынан бастап бұл сома 297,52 теңгеге дейін өседі. Яғни су мен кәріз қызметі шамамен 36%-ға қымбаттайды.
Айына 10 текше метр су пайдаланатын отбасы сумен жабдықтау мен кәріз қызметіне 2 975 теңге төлейді. 15 текше метр пайдаланса – 4 463 теңге, 20 текше метр болса – шамамен 5 950 теңге. Бұл тек суық су мен кәріз қызметінің ақысы. Ал коммуналдық төлем түбіртегінде бұдан бөлек электр энергиясы, жылу, газ, ыстық су, үйді күтіп ұстау және басқа да шығындар бар.
Әрине, коммуналдық инфрақұрылымды жөндеу қажет пе деген сұрақ туындамайды – оны жаңғырту керек. Мәселе басқада: жылдар бойы қордаланған тозудың шығынын тұтынушы қанша рет өтеуге тиіс?
Коммуналдық қызметтердің қымбаттауы «Тарифті инвестицияға айырбастау» бағдарламасы аясында жүріп жатыр. Тұтынушылардан түсетін қаражат көбейген сайын желілерді жаңғыртуға мүмкіндік те артады. Алайда қарапайым алматылықтар тарифтің өсуіне басқаша қарайтыны анық. Қаланың коммуналдық инфрақұрылымы ондаған жыл бойы төмен тариф жағдайында тозды. Енді оны қалпына келтіру үшін коммуналдық қызметтердің бағасын көтеру туралы шешім қабылданды.
Сонда тұтынушыға не қалады? Бір жағынан – ескірген құбырлар, екінші жағынан – қымбаттаған су. Оның үстіне инженерлік желілерді жаңарту қарқыны соншалық баяу, алғашқы кезеңдерде ауыстырылған желілердің өзі бүкіл жүйе толық жаңарып болғанша қайта тозып үлгеруі мүмкін. Осылайша мәселе тығырыққа тіреліп тұр.
