Ақтөбе облысының Қарғалы ауданында мас күйінде көлік жүргізгені үшін сотталған азамат полиция бөлімінің уақытша ұстау изоляторынан қашуға әрекеттенді. Ол изолятордан шығып үлгергенімен, бостандықта ұзақ жүре алмады – сол күні-ақ ұсталды.
Бұл оқиға бір ғана қашу фактісімен шектелмейді. Мұнда ер адамның бұған дейін де заң бұзғаны, изолятордағы қауіпсіздік шараларының осалдығы және қашқаннан кейінгі жағдайдың өрбуі назар аудартады.
«Қарғалы ауданындағы ауылдардың бірінде тұратын 33 жастағы ер адам мас күйінде көлік жүргізген. Оның үстіне сол кезде жүргізуші куәлігінен айырылған болатын. Осы әрекеті үшін ол бас бостандығынан айыру жазасына кесілді. Алайда үкім шыққаннан бірнеше күн өткен соң Бадамшадағы Қарғалы аудандық полиция бөлімінің уақытша ұстау изоляторынан қашып шыққан», – деп «Диапазон» хабарлады.
Жарияланған мәліметке қарағанда, ер адам изолятордың ішкі ауласындағы кешкі серуен кезінде қашуды ұйғарған.
«Ол есіктегі аспалы құлыпты ашып, басқа серуендеу ауласына өткен. Сол жерде қабырғадан шығып тұрған ұлутасты итеріп, арматураны сындырып, ғимараттың төбесіне көтерілген. Одан кейін тікенекті сымнан асып, сыртқа шыққан. Алайда алысқа ұзай алмады – сол күні қайта ұсталды. Қашудың мән-жайы сот үкімінде егжей-тегжейлі жазылған», – дейді журналистер.
Қашқаны үшін сотталған азаматқа тағы бір жаза тағайындалды. Енді ол жалпы есеппен екі жыл бас бостандығынан айырылады. Бірақ бұл жолы полиция бөліміндегі уақытша ұстау изоляторында емес, қатаң режимдегі түзеу мекемесінде жазасын өтейді. Ол жерден қашып шығу әлдеқайда қиын.
Бұл адамның заңды қайта-қайта бұзып, ақыры бас бостандығынан айырылуға дейін барған жолы өзгелерге де сабақ боларлық.
Біріншіден, ол бұған дейін көлік жүргізу құқығынан айырылғанымен, бостандықта жүрген. Соған қарамастан, мас күйінде рөлге қайта отырған. Шамасы, жаяу жүргеннен гөрі ішімдік ішіп көлік айдағанды жөн көрген. Ал Қылмыстық кодексте мұндай әрекет үшін бас бостандығынан айыру жазасы қарастырылған. Сот та соған сәйкес үкім шығарды.
Екіншіден, бұл жаза да оны тоқтата алмады. Мас күйінде көлік жүргізуге әуес азамат жазасын өтеп бітірместен, өз бетімен бостандыққа шығуды ұйғарған. Бірақ ойы іске аспады.
Уақытша ұстау изоляторының ішкі ауласы қалай жабдықталғанын, қашуға қарсы қорғаныс қаншалықты мықты екенін білмейміз. Дегенмен ИВС қызметкерлеріне бір сұрақ туындайды: қамаудағы адам бірнеше кезеңмен қашу жолын жасап жатқанда, олар қайда болды? Аспалы құлыпты ашу (кілт қайдан шықты?), қабырғаны бұзу, арматураны майыстыру, шатырға шығу – мұның бәрі бес минутта бітетін шаруа емес. Оның үстіне осынша әрекетті ешкімге естіртпей жасау да оңай емес. Соған қарағанда, қашқын ауылды жаяу кесіп өтіп кеткеннен кейін ғана оның жоқ екені белгілі болған.
УҰИ қызметкерлеріне осы оқиғаға байланысты қандай да бір шара қолданылды ма – ол жағы белгісіз. Жарияланымда бұл туралы айтылмаған.
