Мәскеу. 9 қазан. ИНТЕРФАКС – Еуразиялық экономикалық комиссия (ЕЭК) Қытайда өндірілетін, мұнай және газ ұңғымаларын бұрғылау мен пайдалануға арналған жіксіз болат құбырларға қатысты демпингке қарсы шаралардың мерзімін тағы бес жылға ұзартты. Тиісті шешім ЕЭК сайтында жарияланды.
Шара 2031 жылғы 5 қазанды қоса алғандағы мерзімге дейін қолданылады.
Қытайдан әкелінетін мұнай-газ саласына арналған құбырларға импорттық баж және баға жөніндегі міндеттемелер түріндегі демпингке қарсы шара ЕЭК-тің 2015 жылғы 18 тамыздағы шешімімен енгізілген. Өндірушіге байланысты баж мөлшері тауардың кедендік құнының 12,23%-ынан 31%-ына дейін белгіленген.
Бұл шараның мерзімі 2026 жылғы 26 сәуірде аяқталуға тиіс болатын. Алайда ЕАЭО өндірушілерінің өтініші бойынша комиссия 2025 жылдың соңында қайта тергеп-тексеру жүргізуге кірісті. Ақпанда тексеру аяқталғанға дейін демпингке қарсы баждың қолданылу мерзімі 2026 жылғы 21 желтоқсанға дейін ұзартылды.
Биыл жазда ЕЭК қайта жүргізілген демпингке қарсы тергеп-тексерудің қорытындысы туралы баяндамасын жариялады. Онда жиналған деректер Қытайдан тауарды демпингтік бағамен жеткізу жалғасуы мүмкін екенін және қолданыстағы шара тоқтатылса, ЕАЭО өнеркәсібіне қайтадан зиян келу қаупі барын көрсететіні айтылған.
«Қытайдың өндірістік әлеуеті зор және ол шегендеу, сорғы-компрессорлық әрі бұрғылау құбырларын әлемде ең көп экспорттайтын ел. Сонымен қатар бірқатар мемлекет Қытайдан жеткізілетін осы өнімдерге сауда-саттықты қорғау шараларын қолданып отыр. Атап айтқанда, ЕО, АҚШ, Канада және Үндістанда демпингке қарсы шаралар енгізілген. АҚШ пен Канадада өтемақы баждары қолданылады. ЕО мен Ұлыбританияда болат өнімдеріне, соның ішінде аталған құбырларға тарифтік квоталар белгіленген. Бұдан бөлек, АҚШ Қытайдан әкелінетін тауарларға қосымша баж мөлшерлемелерін қолданады.
Осы жағдайларды ескерсек, демпингке қарсы шараның күшін жою Қытайдан ЕАЭО кедендік аумағына төмен бағамен жеткізілетін өнім көлемінің айтарлықтай артуына әкелуі ықтимал. Бұл өз кезегінде одақтағы тиісті саланың өндірістік және қаржылық көрсеткіштеріне кері әсер етуі мүмкін», – деп мәлімдеген еді ЕЭК.
