Мәскеу. 21 қазан. ИНТЕРФАКС – SpaceX пен Tesla (SPB: TSLA) компанияларын біріктіру көптеген артықшылық әкелуі мүмкін. Бұл туралы екі компанияның да бас атқарушы директоры Илон Маск SpaceX-тің тоқсандық қаржылық нәтижелеріне арналған конференцияда мәлімдеді.
«Меніңше, бұл жақсы идея болар еді. Алайда түпкілікті шешімді арнайы комитеттер қабылдайды», – деді Маск. Ол акционерлердің бастамасымен SpaceX пен Tesla компанияларында құрылған жұмыс топтарын меңзеді. Сонымен қатар кәсіпкер бұл мәселені талқылауға өзі қатыса алмайтынын, өйткені мәмілеге мүдделі тарап екенін атап өтті.
«Екі компанияны біріктірудің көптеген артықшылығы бар», – деді Маск. Оның айтуынша, әсіресе жасанды интеллектке арналған бағдарламалық жасақтама әзірлеу, микросхемаларды жобалау және робот техникасы салаларындағы ынтымақтастықтың әлеуеті зор.
Қазірдің өзінде компаниялар Terafab бірлескен жобасы аясында микросхемалар өндіру бағытында жұмыс істеп жатыр. Масктың болжамынша, Terafab келесі жылдың мамыр-маусым айларында алғашқы сынақ микросхемасын шығарып, 2028 жылдың үшінші тоқсанында жаппай өндіріске кірісуі мүмкін.
Сонымен бірге SpaceX басшысы екі компанияның бірігетіні туралы нақты қорытынды жасауға әлі ерте екенін ескертті. Өйткені арнайы комитеттер ықтимал мәміленің шарттарын әлі келісіп болған жоқ. Оның үстіне, тараптар ортақ шешімге мүлде келмеуі де мүмкін.
Маск сондай-ақ компанияның деректер орталықтарындағы есептеу қуаттарына сұраныстың күрт артуына байланысты SpaceX-тің тұрақты қайталанатын кірісі (ARR) 2027 жылдың соңына қарай жылдық есеппен 500 млрд–1 трлн долларға жетуі ықтимал екенін айтты.
Шілде-қыркүйек айларында SpaceX 14,6 млрд доллар табыс тапты. Бұл өткен жылдың үшінші тоқсанындағы көрсеткіштен 2,6 есе көп. Ал жасанды интеллект сегментіндегі кіріс 9,3 есе өсіп, 7,6 млрд долларға жетті. Есепті тоқсан қорытындысында компания 4,4 млрд доллар таза пайда тапқан. Ал бір жыл бұрын осы кезеңде 1,1 млрд доллар шығынға ұшыраған еді.
Сәрсенбі күні алдын ала сауда барысында SpaceX акциялары 9,8%-ға, ал Tesla бағалы қағаздары 1,6%-ға қымбаттады.
