АСТАНА. 2 қараша. ИНТЕРФАКС-ҚАЗАҚСТАН – Қазақстандық Qarmet металлургия комбинаты өндірісті жаңғыртуға жоспарланған 3,5 млрд доллардың 2,7 млрд доллардан астамын инвестициялады. Бұл туралы Қазақстан Президентінің баспасөз қызметі хабарлады.
«Компания жұмысын бастағаннан бері инвестиция көлемі 2,7 млрд доллардан асты. Қаражат қолданыстағы өндірістік қуаттарды жаңғыртуға және жаңа кәсіпорындар салуға бағытталды», – делінген Мемлекет басшысының дүйсенбі күні Qarmet өндіріс орнына сапары барысында таратылған хабарламада.
Президенттің баспасөз қызметі Qarmet компаниясының жалпы инвестициялық бағдарламасы 3,5 млрд долларды құрайтынын еске салды.
Қазір металлургия комбинатында төрт жаңа жоба жүзеге асырылып жатыр. Олар – №8 және №9 кокс батареялары, сұрыптық прокат кешені, мырыштау және полимерлі жабын жағу желісі, сондай-ақ құю-прокат кешені.
Қазақстан Үкіметімен жасалған келісімге сәйкес, Qarmet иесі 2028 жылдың соңына дейін өндірісті жаңғыртуға 3,5 млрд доллар инвестиция салуға міндеттенген.
Qarmet (бұрынғы «АрселорМиттал Теміртау») – болат өндіру және тау-кен өнеркәсібі салаларында жұмыс істейтін, өндірістік үдерістері өзара біріктірілген компания. Оның қарамағында Қазақстандағы ең ірі болат өндіруші кәсіпорын – Қарағанды металлургия комбинаты бар.
2023 жылы қазақстандық Allur автомобиль өндіруші компаниясының тең иесі Андрей Лаврентьев «АрселорМиттал Теміртауды» 286 млн долларға сатып алды. Кейін кәсіпорынның атауы Qarmet болып өзгертілді.
