Астана. 7 қараша. ИНТЕРФАКС-ҚАЗАҚСТАН – Қазақстан мен Тәжікстан жыл сайынғы өзара сауда көлемін 2 млрд долларға жеткізуді жоспарлап отыр. Осы мақсатта 2030 жылға дейінгі тауар айналымын ұлғайту жөніндегі жол картасы қабылданды. Бұл туралы Қазақстан Президентінің баспасөз қызметі хабарлады.
«Бірлескен жұмыстың арқасында екіжақты тауар айналымы екі миллиард долларға жақындап келеді. … Осы межеге жету үшін бүгін тауар айналымын ұлғайтудың 2030 жылға дейінгі жол картасы қабылданды», – деді Мемлекет басшысы. Оның айтуынша, екі ел үкіметіне құжатта көзделген шараларды сапалы орындау тапсырылған.
Тоқаев Қазақстанның Тәжікстандағы ең ірі үш сыртқы сауда серіктесінің бірі екенін еске салды.
Бұған дейін хабарланғандай, Қазақстан мен Тәжікстанның жыл сайынғы тауар айналымы тұрақты түрде 1 млрд доллардан асып келеді. Биыл екі ел арасындағы сауда көлемі тоғыз айдың өзінде осы межеге жетіп, 26%-ға өсті.
Тоқаев өзара сауданы ұлғайтуға аграрлық саланың мүмкіндігі мол екенін атап өтті. 2025 жылы екі ел арасындағы ауыл шаруашылығы өнімдерінің саудасы 11%-ға өсіп, 600 млн долларға жуықтады. Бұл жалпы тауар айналымының жартысына жуығын құрайды.
Қазақстан мен Тәжікстан бір-біріне азық-түлік жеткізу көлемін одан әрі арттыруға дайын. Тараптар ауыл шаруашылығы өнімдерін өңдеудің барлық кезеңін қамтитын өндіріс жүйесін құру мүмкіндіктерін де талқылады.
Қазақстан Президенті екі ел экономикасының өсуіне тың серпін беретін бірлескен жобаларды іске асыру маңызды міндет екенін айтты. Оның пікірінше, энергетика, мұнай-газ, тау-кен металлургиясы және өңдеу салаларындағы өзара тиімді әріптестіктің келешегі зор.
Тоқаев сапар қарсаңында өткен Қазақстан–Тәжікстан бизнес-форумы екі ел кәсіпкерлерінің түрлі бағытта байланыс орнатуға мүдделі екенін көрсеткенін жеткізді.
