ҚР Денсаулық сақтау министрлігінің хабарлауынша, Қазақстанда босандыру ұйымдарының, балалар стационарлары мен жедел медициналық жәрдем станцияларының басшылары және олардың орынбасарларын аттестаттау жалғасып жатыр. 2026 жылы 2 қарашадағы мәлімет бойынша, тестілеуге қатысқандардың 20 пайызы шекті балл жинай алмаған. Аттестаттаудың бірінші кезеңі – тестілеу 14 қазанда басталды. 2 қарашадағы жағдай бойынша оған еліміздің 15 өңірінен 235 адам қатысқан. Бұл аттестаттаудан өтуге тиіс мамандардың жалпы санының 72,1 пайызын құрайды. Алдын ала жасалған қорытындыға сәйкес, 188 қатысушы, яғни 80 пайызы тестілеуден сәтті өткен. Қалған 47 адам (20%) қажетті балл жинай алмаған. Олардың 25-і – медициналық ұйымдардың басшылары, 22-сі – басшы орынбасарлары. Бұдан бөлек, 27 адам тестілеуге келмеген. Тестілеуден өте алмағандар саны Ақмола, Маңғыстау және Қостанай облыстарында ең жоғары болып отыр. Шекті балл жинай алмаған қатысушылардың 55,3 пайызы осы үш өңірге тиесілі. Ал Астана қаласы мен Павлодар облысында тестілеуге қатысқандардың барлығы сынақтан сәтті өткен. Министрлік аттестаттау тек аталған медициналық ұйымдардың басшылары мен олардың орынбасарларына қатысты жүргізілетінін атап өтті. Кәсіби құзыреттілікке аттестаттау қағидаларына сәйкес, тестілеуден өте алмаған қатысушылар әңгімелесу кезеңіне жіберілмейді. Олар алты айдан кейін қайта аттестаттаудан өтуге тиіс.
Еуразия24 пікірі:
Осы мәліметтерге сүйенсек, тестілеуден өте алмаған 47 басшы басқаратын медициналық мекемелердің қызметі қаншалықты бақылауға алынған? Олардың жұмысына қатысты пациенттерден шағым түскен бе?
Мәселен, тестілеу нәтижелері төмен болған Ақмола облысында 2025 жылы медициналық ұйымдарға қатысты 413 шағым түскені белгілі. Бұл алдыңғы жылмен салыстырғанда үштен бірге көп. Оның үстіне, шағымдардың 65 пайызы негізді деп танылған. Сонымен қатар, өңірдегі ана өлімі мәселесі де Үкімет деңгейінде қаралған. 2025 жылдың алғашқы 10 айының қорытындысы бойынша, ана өлімі көрсеткіші тірі туған әрбір 100 мың нәрестеге шаққанда 49,6 жағдайды құраған. Ал болжамды көрсеткіш 11,8 болған.
Маңғыстау облысында 2026 жылдың алғашқы алты айында алғашқы медициналық-санитариялық көмекке қатысты шағымдар саны 4,3 есе артқан. Бұл – еліміздегі ең жоғары өсім. Айта кетейік, Ақмола облысында да шағымдар саны 2,1 есе көбейген.
Қостанай облысындағы жағдай да көңіл көншітпейді. Өңірлік денсаулық сақтау басқармасының ресми мәліметіне сәйкес, 2026 жылдың бірінші жартыжылдығында 37 нәресте өлімі тіркелген. Ал 2025 жылдың сәйкес кезеңінде бұл көрсеткіш 34 болған. Нәресте өлімінің коэффициенті тірі туған әрбір мың нәрестеге шаққанда былтырғы 7,6-дан биыл 10,8-ге дейін өскен. Яғни нәресте өлімі үш жағдайға ғана артқанымен, салыстырмалы көрсеткіш 42 пайызға жоғарылаған.
Біз өңірлердегі қолайсыз медициналық статистика нақты басшылардың аттестаттаудан төмен нәтиже көрсетуімен тікелей байланысты деп тұжырым жасап отырған жоқпыз. Дегенмен бұл мәселеге аттестаттауды ұйымдастырып отырған Денсаулық сақтау министрлігінің өзі назар аударуы тиіс деп есептейміз.
