Вашингтон, 9 шілде. ИНТЕРФАКС – АҚШ-тың Техас штатындағы Керр округінде болған жойқын су тасқынынан кейін 161 адам әлі де із-түзсіз жоғалғандар қатарында саналып отыр. Бұл туралы сәрсенбі күні америкалық бұқаралық ақпарат құралдары хабарлады.
«Тек Керр округінің өзінде 161 адам хабар-ошарсыз кеткен деп есептелуде»,– деді Техас губернаторы Грег Эбботт баспасөз мәслихатында.
Оның мәліметінше, табиғи апат салдарынан кемінде 109 адам қаза тапқан, соның 94-і – Керр округінде. Бұған дейін қаза тапқандар саны 100-ден асқаны хабарланған болатын.
Жергілікті билік өкілдері қаза тапқандар мен жоғалғандар саны алдағы күндері одан әрі өсуі мүмкін екенін ескертті.
Қазіргі уақытта Техас штатында тарихтағы ең ауқымды іздестіру құтқару операцияларының бірі жүргізіліп жатыр. Оған үрлемелі қайықтар, тікұшақтар және атты іздеу топтары жұмылдырылған.
Су тасқыны өткен аптада бірнеше күн бойы толассыз жауған нөсер жаңбырдан кейін басталған. Ең көп зардап шеккен аймақ – Керр округі. Мұнда бірнеше балалар лагері мен демалыс орындары орналасқан. Олардың қатарында қыздарға арналған христиан жазғы лагері – «Mystic» те бар. Бұл лагерьде саяси элитаның балалары жиі демалатын. Дүйсенбі күні жарияланған мәліметке сәйкес, аталған лагерь 27 қыз бала мен тәлімгердің қазасына байланысты қара жамылып отыр.
