Астана, 9 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев халықты таза ауыз сумен қамтамасыз ету мәселесін басты міндеттердің бірі ретінде атап өтті. Бұл туралы ол сәрсенбі күні Астанада су шаруашылығы саласы қызметкерлерімен кездесуде мәлімдеді.
«Бүгінде қала мен ауыл тұрғындарының басым бөлігі таза ауызсуға қол жеткізген. Дегенмен шамамен 500 ауылды сапалы сумен қамтамасыз ету – негізгі басымдықтардыңбірі болып табылады. Әсіресе, ауызсуды тазарту мәселесін шешу өте маңызды. Халық «Судың да сұрауы бар» деп бекер айтпаған. Ауызсуды ұқыпты пайдалану – аса өзекті мәселе», – деді Мемлекет басшысы.
Президенттің айтуынша, Қазақстан аумағы кең болғанымен, оның көп бөлігін шөл және шөлейт жерлер алып жатыр.
«Сондықтан су ресурстарын ұлттық қауіпсіздіктің бір бөлігі деуге толық негіз бар. Бұл сала үнемі мемлекеттің жіті назарында. 2023 жылғыЖолдауымда суды үнемді пайдалану мәселесіне арнайы тоқталдым. Су ресурстары және ирригация министрлігі құрылды. Нақты міндеттер айқындалып, ауқымды реформалар жүзеге асырылды, жаңа Су кодексіқабылданды. Ірі инфрақұрылымдық жобалар қолға алынды. Су нысандарын салу мен жаңғыртуға қомақты қаржы бөлінуде, шетелдік инвестициялар да тартылып жатыр», – деді Тоқаев.
Мемлекет басшысы қазіргі таңда су шаруашылығы саласында шамамен 30 мың маман еңбек етіп жатқанын, олар қалалар мен ауылдарға, өнеркәсіп нысандарына және егістік алқаптарына су жеткізу жұмыстарын қамтамасыз етіп отырғанын атап өтті.
