Астана, 9 шілде. ИНТЕРФАКС-ҚАЗАҚСТАН – Қазақстан Премьер-министрі Олжас Бектенов «Яндекс» компаниясының бас директоры Даниил Шулейко және Yandex Qazaqstan жобасының жетекшісі Тимур Шалекеновпен кездесу барысында елдегі технологиялық жобаларды дамыту және платформалық жұмыспен қамту бағыттарын талқылады. Бұл туралы Үкімет басшысының баспасөз қызметі хабарлады.
Баспасөз хабарламасында атап өтілгендей, Yandex Qazaqstan бастамасымен іске қосылған платформалық жұмыспен қамту моделі үкіметтің өзін-өзі жұмыспен қамтыған азаматтардың салықтық реттеу механизмдерін әзірлеуі аясында өзекті сипат алып отыр.
Еліміздегі алғашқы салық агенті болып «Яндекс Такси» тіркелді. Өткенжылдың қыркүйегінде іске қосылған сәттен бастап, платформада тіркелгендер саны 86 мың адамға жетті. Жобаға 4,9 млрд теңгеден астам инвестиция салынды, ал агент ретінде компания 4,3 млрд теңге көлемінде салықты ұстап, бюджетке аударды», – делінген хабарламада.
Премьер-министр азаматтарға қолайлы цифрлық шешімдерді енгізу жөнінде Мемлекет басшысы Қасым-Жомарт Тоқаевтың тапсырмасын еске сала отырып, үкіметтің платформалық жұмыспен қамтуды реттеуде әлеуметтік қорғау, салық салу және өзін-өзі жұмыспен қамтығандар мен фрилансерлердің құқықтық мәртебесіне қатысты жаңа тәсілдерге мүдделі екенін атап өтті.
«Бұл секторды көлеңкеден шығарып, белсенді экономикаға тарту үшін 2026 жылғы 1 қаңтардан бастап жаңа салық режиміне кезең-кезеңмен көшу маңызды. Бұл – жүздеген мың азаматымызға қатысты мәселе», – деді Бектенов.
«Яндекс» бас директоры Даниил Шулейко компанияның Қазақстанда технологиялық бастамаларды дамытуды жалғастыру ниетін растады.
Кездесу барысында сондай-ақ қалааралық жолаушылар тасымалы сервисін дамыту жоспарлары сөз болды. Бүгінде Yandex Qazaqstan ел бойынша негізгі бағыттардың басым бөлігін қамтып отыр.
Баспасөз қызметінің мәліметінше, жол қауіпсіздігіне ерекше көңіл бөлінуде. Жолаушылар мен жүргізушілердің қауіпсіздігін қамтамасыз ету үшін жүргізуші куәлігін тексеру, селфи-бақылау, көлік құралдарының фото тексерісі енгізілген. Жүйе жүргізушінің жылдамдығын, шаршау деңгейін және өзге де параметрлерді бақылайды. Бұзушылықтар мен жол-көлік оқиғалары, бағыттан ауытқулар нақты уақыт режимінде тіркеліп, қадағаланады.
Сонымен қатар, пилоттық режимде 1414 call-орталығында қазақ және орыс тілдерінде жұмыс істейтін жасанды интеллектке негізделген дауыстық көмекші іске қосылып жатыр.
Жедел жәрдем шақыруларын қалалық картада визуализациялау жобасы да дамуда.
Бұған дейін хабарланғандай, 2024 жылы Yandex Qazaqstan тарапынан төленген салық көлемі 29,5 млрд теңгені құраған. 2016 жылдан бері компанияның Қазақстан экономикасына салған жиынтық инвестициясы 225 млрд теңгеден асқан.
9 шілдедегі ресми валюта бағамы – 1 АҚШ доллары үшін 519,58 теңге.
