Токио, 15 шілде. Қытай Халық Республикасының сыртқы саясаты мен әскери белсенділігі бұрын-соңды болмаған стратегиялық қауіп төндіріп отыр. Бұл туралы Жапония Қорғаныс министрлігінің жыл сайынғы «Ақ кітап» атты баяндамасында айтылған.
2025 жылғы есепте: «Қытайдың сыртқы саясаты, әскери белсенділігі және басқа да әрекеттері Жапония мен халықаралық қауымдастық тарапынан елеулі алаңдаушылық тудырып отыр. Бұл – Жапонияға қарсы бағытталған бұрын-соңды болмаған және аса маңызды стратегиялық сын-қатер. Жапония бұған бүкіл ұлттық әлеуетін жұмылдырып, одақтастары және пікірлес елдермен бірлесе отырып жауап беруі тиіс», – делінген.
Министрліктің мәліметінше, Қытай Жапония маңындағы бүкіл өңірде белсенділігін күшейтіп жатыр. Бұл Жапонияның қауіпсіздігіне елеулі әсер етуі мүмкін.
Сондай-ақ, құжатта Қытайдың Ресеймен, соның ішінде әскери саладағы ынтымақтастығын нығайтып жатқаны атап өтілген.
Жапония Қорғаныс министрлігінің мәлімдемесінде: «Бұл екі елдің қайталанған бірлескен іс-қимылдары Жапонияға күш көрсетуге бағытталғаны анық және ұлттық қауіпсіздік тұрғысынан айтарлықтай алаңдаушылық тудырады», – делінген.
