Пекин, 15 шілде – Ресей Федерациясының сыртқы істер министрі Сергей Лавров пен Қытай Халық Республикасының төрағасы Си Цзиньпин Пекинде өткен кездесуде РФ президенті Владимир Путиннің Қытайға жоспарланған сапарын талқылады. Бұл туралы Ресей Сыртқы істер министрлігі хабарлады.
«С.В. Лавров ҚХР төрағасына Ресей Федерациясының Президенті В.В. Путиннің достық сәлемін және ізгі тілектерін жеткізді. Кездесу барысында Ресей президентінің Шанхай ынтымақтастық ұйымының саммитіне және милитаристік Жапонияға қарсы Жеңістің 80 жылдығына арналған салтанатты іс-шараларға қатысуы аясында Қытайға сапарына дайындық мәселелері қаралды», – делінген министрлік мәлімдемесінде.
Сондай-ақ тараптар халықаралық және өңірлік күн тәртібіндегі бірқатар өзекті тақырыптарды қозғады.
РФ СІМ дерегінше, Қытай төрағасы екі ел арасындағы қазіргі қарым-қатынасты жоғары бағалап, жан-жақты стратегиялық әріптестікті әрі қарай нығайтуға ниетті екенін растады.
Лавров пен Си Цзиньпиннің келіссөздері Пекиндегі Халық жиналысы сарайында өтті. Бұған дейін бұл жерде Қытай көшбасшысының ШЫҰ-ға мүше мемлекеттердің сыртқы істер министрлерімен ұжымдық кездесуі өткен болатын.
