Мәскеу. 28 шілде. ИНТЕРФАКС – «Роскосмос» мемлекеттік корпорациясының бас директоры Дмитрий Баканов АҚШ-та ресейлік ғарышкер қатысатын Crew Dragon кемесінің Халықаралық ғарыш станциясына (ХҒС) ұшырылуы аясында NASA-ның жаңа басшылығымен кездесу өткізуді жоспарлап отырғанын мәлімдеді.
«Біз NASA-ның жаңа басшысымен кездесу өткізуді жоспарлап отырмыз», – деді ол «РБК-ТВ» телеарнасының эфирінде.
Оның айтуынша, келіссөздер Crew Dragon кемесінің ХҒС-қа ұшырылуы аясында өтеді, экипаж құрамында ресейлік ғарышкер бар.
«Біз бұл ұшырылымға арнайы шақырылдық. Сол сапар аясында “Роскосмос” пен NASA арасындағы ықтимал әріптестік пен өзара іс-қимыл мәселелері бойынша бірқатар келіссөздер өткізілмек», – деді Баканов.
NASA мәліметінше, SpaceX компаниясының Crew Dragon кемесімен ресейлік ғарышкер Олег Платонов қатысатын ұшу 31 шілдеден кейінгі мерзімге жоспарланған.
15 шілде күні Дмитрий Баканов Ресей мен АҚШ ғарыш агенттіктері маусым айында Мәскеуде Axiom-4 коммерциялық миссиясын іске асыруға байланысты ХҒС-тың техникалық жай-күйі жөнінде консультациялар өткізгенін хабарлаған болатын.
Бұған дейін, 8 сәуірде, ол “Роскосмос” АҚШ-тағы жаңа басшылықпен өзара тиімді келісімдерге қол жеткізеді деп үміттенетінін айтқан еді. Сонымен қатар Байқоңырда өткен кездесу барысында ХҒС бағдарламасы аяқталғаннан кейін орбиталық ғарыш кеңістігін игеру және Айды зерттеу жөніндегі жоспарлар талқыланған.
12 сәуірде Баканов “Роскосмос” пен NASA арасындағы Халықаралық ғарыш станциясындағы миссияны аяқтау мерзімдерін үйлестіру жөнінде келісім жасалғанын хабарлады.
