АСТАНА. 11 тамыз. ИНТЕРФАКС-ҚАЗАҚСТАН. Қазақстан Президенті Қасым-Жомарт Тоқаев Үкіметке үш айдың ішінде жасанды интеллектті (ЖИ) мемлекеттік қызметтер саласына кеңінен енгізу жөнінде нақты шаралар пакетін әзірлеуді тапсырды.
Дүйсенбі күні Астанада өткен жасанды интеллектті дамыту мәселелеріне арналған кеңесте Мемлекет басшысы қазіргі уақытта ChatGPT қағидаттарымен жұмыс істейтін бірқатар жоба іске асырылып жатқанын атап өтті.
«Бұл тәсілдер азаматтардың сұраныстарына жедел жауап беруге мүмкіндік береді. Алайда бұл – ұзақ жолдың алғашқы қадамы ғана. Озық технологиялардың әлеуеті әлдеқайда жоғары. Жасанды интеллект мемлекеттік аппараттың жұмысын түбегейлі жеңілдетуі тиіс», – деді Қ.Тоқаев.
Президенттің сөзінше, Қазақстанда көптеген мемлекеттік қызмет әлі күнге дейін «цифрлық бекіту» деңгейінде қалып отыр: құжаттар электронды түрде қабылданып, өңделгенімен, рәсімдердің өзі мемлекеттік қызметшілердің қолмен араласуын талап етеді.
«Бұл – іс жүзінде қағаз құжат айналымын сол күйі цифрлық ортаға көшіру, бірақ шынайы тиімділікті арттырмайтын тәсіл. Біз жасанды интеллекттің мүмкіндіктерін пайдаланып, түбегейлі жаңғыртуға болатын мемлекеттік қызмет түрлерін нақты белгілеуіміз керек. Сол арқылы босайтын кадрлық және техникалық ресурстарды басқа да маңызды, күрделі міндеттерді орындауға жұмылдыру қажет», – деді ол.
Осыған байланысты Қасым-Жомарт Тоқаев Үкіметке үш ай мерзімде мемлекеттік қызметтерге жасанды интеллектті енгізу бойынша нақты қадамдар әзірлеуді тапсырды. «Әсіресе өтініштерді қарау мен шешім қабылдау үдерістерінде ЖИ-ді кеңінен қолдану қажет. Мемлекеттік басқару жүйесінің барлық деңгейінде пайдалануға болатын нақты тетіктер қажет», – деп түйіндеді Президент.
