АСТАНА. 11 тамыз. ИНТЕРФАКС-ҚАЗАҚСТАН. Қазақстан Еуразиядағы цифрлық хабқа айналып, Қытайдың жасанды интеллект саласындағы ынтымақтастық жөніндегі жаһандық ұйым құру бастамасын қолдауы қажет. Бұл туралы ел Президенті Қасым-Жомарт Тоқаев жасанды интеллектті дамыту мәселелері жөніндегі кеңесте айтты, деп хабарлады Мемлекет басшысының баспасөз қызметі.
Президенттің айтуынша, бүгінде әлемде жасанды интеллекттің қарқынды дамуына байланысты ауқымды технологиялық өзгерістер жүріп жатыр.
«Бұл технология әлемдегі барлық елдердің дамуына тікелей ықпал етеді. Онсыз қазіргі таңда жаһандық бәсекеге төтеп беру мүмкін емес. Бір сөзбен айтқанда, озық технологиялар – ұлттық тәуелсіздіктің кепілі, экономикалық өсімнің қозғаушы күші. Біз жасанды интеллект саласында белгілі бір жетістікке жеттік, алайда босаңсуға болмайды. Бұл стратегиялық бағытта белсенді жұмыс істеуіміз қажет», – деді Тоқаев.
Мемлекет басшысы биыл шілде айында АҚШ президенті Дональд Трамп әкімшілігі жариялаған America’s AI Action Plan стратегиясында жасанды интеллект АҚШ-тың технологиялық, экономикалық және қорғаныс салаларындағы көшбасшылығының маңызды құралы ретінде танылғанын еске салды.
«Біздің мамандар осы және өзге де ұқсас құжаттарды мұқият зерделеп, нақты қорытынды жасауы тиіс. Өз кезегінде Қытай Халық Республикасы жасанды интеллект саласында ынтымақтастық жөніндегі Жаһандық ұйым құруды ұсынды. Мақсат – жасанды интеллектті басқаруда көпжақты тәсілді ілгерілету, цифрлық алшақтықты қысқарту, этиканы дамыту және ИИ-ді тұрақты пайдалану. Мұндай ұйым құру жөніндегі Қытайдың ұсынысын қолдап, дайындық шараларына қатысуымыз қажет деп санаймын. Бұл – еліміздің мүддесіне сай», – деді Президент.
Қасым-Жомарт Тоқаев Қазақстанның басты мақсаты – Еуразияның цифрлық хабына айналу екенін атап өтті.
