Kursiv хабарлайды: “2026 жылдың 1 қаңтарынан бастап Қазақстанда e‑Tamga деп аталатын жаңа салық жүйесі енгізіледі, ол электрондық шот-фактуралардың (ЭСФ) рәсімделу тәртібін түбегейлі өзгертеді. Бұл жүйе, Ұлттық кәсіпкерлер палатасы «Атамекен» өкілдерінің пікірінше, Қазақстандық бизнес үшін айтарлықтай қауіп тудырады. Мәселе мынада, жаңа e‑Tamga жүйесі енгізілгеннен кейін, компаниялар қосылған құн салығы (ҚҚС) көрсетілген электрондық шот-фактураларды (ЭСФ) тек салықты алдын ала төлегеннен кейін ғана рәсімдей алады. Егер арнайы шотта қажетті қаражат болмаса, жүйе операцияны автоматты түрде бұғаттайды. Жаңа ережелер ҚҚС төлеуші ретінде жаңадан тіркелген барлық субъектілерге, қатысушылары толық ауысқан компанияларға, ЭСФ жазу құқығын қайта қалпына келтірген ұйымдарға, сондай-ақ бұған дейін салық органының талабы бойынша құжаттарын кері қайтарып алған тұлғаларға қолданылады. Егер бұл талап бүкіл бизнеске қолданылатын болса, онда бұл шағын және орта кәсіпкерлікке айтарлықтай соққы болмақ. ҚҚС-ты алдын ала төлеуге кім міндетті, ал кім міндетті емес – осы өлшемшарттарға байланысты анықталатын болады», – деді «Атамекен» Ұлттық кәсіпкерлер палатасы басқарма төрағасының орынбасары Тимур Жаркенов. Кәсіпкерлердің құқықтарын қорғау жөніндегі уәкіл Қанат Нұров ҚҚС-ты алдын ала төлеу идеясы құқықтың негізгі принциптеріне қайшы екенін айтып, бұл норманы алып тастау қажет деп мәлімдеді”.
Евразия24 пікірі:
Жаңа Салық кодексі әлі күшіне енген жоқ, алайда бизнес қазірдің өзінде алаңдаулы.
Әдетте кәсіпкерлер тұрақсыздықты сезінген кезде не істейді? Алдын ала ықтимал шығындардың орнын толтыру үшін бағаны көтере бастайды, заңнамадан әлсіз тұстарды іздеп, қатаң талаптардың орнын өтеуге тырысады және тағы басқа шаралар қолданады. Кәсіпкер Гүлбану Майгаринаның мәліметінше, 40-тан астам бизнес-қауымдастық пен сарапшыны біріктіретін Салық альянсы Мемлекет басшысына e-Tamga жаңа салық жүйесіне қатысты бірқатар ұсыныспен жүгінді: ҚҚС-ты алдын ала төлеу мен ЭСФ-ты автоматты түрде бұғаттауды алып тастауды, бір күндік фирмаларға бағытталған нысаналы бақылауды күшейтуді, салықтық тәуекелдерді басқару жүйесін дамыту мен ашықтықты арттыру арқылы заңды бизнеске қысымды емес, қолдауды қамтамасыз етуді ұсынды. Тағы бір назар аударарлық жайт – кәсіпкерлік еркіндігіне кепілдік беретін Конституцияда салық салудың әділдігі қағидаты бекітілген. Яғни, салық міндеттемесі туындамай тұрып, мемлекет тарапынан салық алу – заңға қайшы. Бұл — бизнес өкілдерінің пікірі, ал мемлекет тарапынан әзірге ешқандай ресми жауап берілген жоқ. Алайда Салық кодексі заңнамалық сараптамадан өтіп, Президентпен бекітілді және жақын уақытта күшіне енбек. Дегенмен, қазіргі уақытта бұл кодекстің нақты қандай нормалары қашан күшіне енетінін айқындайтын арнайы заң әлі қабылданған жоқ. Мұндай заң әдетте бап бойынша нормалардың күшіне ену тәртібін айқындайды. Сол себепті кәсіпкерлер арасындағы алаңдаушылықты түсінуге болады. Біз де бұл жағдайға қатысты билік тарапынан нақты түсіндірме берілгенін күтіп отырмыз.
