«Новый Омск» басылымының хабарлауынша, Омбы қаласында ШЫҰ жастар форумы ашылды. Іс-шараны Виталий Хоценко ашты. Форум он мемлекеттен келген жас кәсіпкерлерді біріктіріп, ШЫҰ-ның «Бизнес-инкубатор» халықаралық акселерациялық бағдарламасы аясында өтуде. Жобаға Қытай, Қазақстан, Үндістан, Қырғызстан, Пәкістан, Тәжікстан, Өзбекстан, Иран, Беларусь және Ресейден келген жас көшбасшылар мен кәсіпкерлер қатысып жатыр. Бағдарламаның негізгі мақсаты – жас кәсіпкерлер арасындағы өзара ынтымақтастықты дамыту, шетелдік инвестициялардың тартылуын арттыру және инновациялық шешімдерді игеру. «ШЫҰ үшін маңызы зор мұндай іс-шараның Омбы жерінде өтуі – біз үшін үлкен мәртебе. Біз көрсетілген сенімді жоғары бағалаймыз және сіздер өздеріңізді жайлы сезініп, форум мен бизнес-инкубатор жұмысына қатысу сіздер үшін нәтижелі болуы үшін бар күшімізді саламыз», – деді Омбы облысының губернаторы Виталий Хоценко. Форум аясында Виталий Хоценко шетелдік ұйымдар мен инвестициялық құрылымдармен ынтымақтастық туралы келісімдерге қол қойды. Жеңістің 80 жылдығы атап өтілетін жылы форумның басты тақырыбы – тарихи жадыны сақтаудағы жастардың үлесі болмақ. Бағдарлама халықаралық бизнесті дамыту, инвестиция тарту және мәдениетаралық коммуникацияға арналған білім беру сессияларын, сондай-ақ ШЫҰ елдерінен келген сарапшылардың қатысуымен өтетін интенсивтер мен дәрістерді қамтиды.
Евразия24 пікірі:
ШЫҰ бүгінде қарқынды дамып келеді. 2025 жыл ұйым үшін «Шанхай рухын ілгерілету: ШЫҰ іс-қимылда» деген ұранмен өтіп жатыр және ол жоғары деңгейдегі маңызды халықаралық шаралармен ерекшеленуде. «Шанхайлық» жастар да ұйымның жалпы қарқынынан қалыс қалмайды. Тамыз айының басында ШЫҰ елдерінің Шығыс Қазақстанда өткен жастар форумында ұйымның ресми жастар қанаты құрылғаны жарияланды. Енді міне, ШЫҰ-ға мүше он елдің жас кәсіпкерлері Омбыда бас қосып, әріптестік байланыстар орнату және бизнес-идеяларды ілгерілету мақсатында кездесті. Бұл жиынның «шанхайлық» жастар үшін маңызы неде? Батыстық антикеңестік насихаттың ықпалынан алшақ, Ұлы Жеңістің тарихи маңызын жоққа шығармайтын ШЫҰ-ның жас бизнес-көшбасшылары форумның рухына ден қойып, адамзат тарихындағы ең қайғылы соғыстың ақиқатын дәріптеу ісінде аға буынның жолын жалғастыруға дайын екенін көрсетті.
