Қытай маусым айында 2025 жылғы ең ірі көлемде – 5,44 млн тонна (газ түрінде 7,074 млрд куб м) сұйытылған табиғи газ (СТГ) импорттады. Бұл деректерді ҚХР Бас кеден басқармасы таратты. Екінші тоқсан бойы жазғы тұтыну шыңының әсерінен ай сайынғы көлем біртіндеп артып отырғанымен, өткен жылғы көрсеткіштермен салыстырғанда импорт төмен деңгейде қалып отыр.
2024 жылдың маусымымен салыстырғанда (5,899 млн тонна) жеткізілімдер 7%-ға азайды. СТГ Қытай нарығында технологиялық тұрғыдан ыңғайлы әрі бағасы тиімді құбыр арқылы жеткізілетін газға орын беруде. Маусым айында Қытай СТГ импорты көлемі бойынша Жапонияны (4,44 млн тонна) артта қалдырды. Бұл үрдіс мамырда да байқалған болатын. Ал желтоқсаннан сәуірге дейін Жапония әлемдік ең ірі сатып алушы мәртебесін сақтап келген.
Қытайға СТГ жеткізушілердің қатарында Ресей жетекші орын алады. Ресейде ірі тоннажды СТГ өндірісімен «Сахалинская энергия» (қатысушылары – «Газпром», Mitsui және Mitsubishi), «Ямал СПГ» («НОВАТЭК», TotalEnergies, CNPC және SRF), сондай-ақ «Газпром СПГ Портовая» мен «Криогаз-Высоцк» зауыттары айналысады.
Құбыр арқылы жеткізілген газ көлемі маусымда 6,762 млрд куб метрге жетіп, былтырғы деңгейден небәрі 5%-ға ғана жоғары болды. Бұл өсім ең алдымен «Сила Сибири» газ құбыры бойынша «Газпромның» жоспарлы жеткізілімін ұлғайтуымен байланысты. Дегенмен, бұл артықшылық Орталық Азия елдерінен келетін ағындардың төмендеуімен ішінара өтелді. Қытай құбыр арқылы газды бес елден алады: Ресей, Қазақстан, Түрікменстан, Өзбекстан және Мьянма.
Жеткізушілер бойынша егжей-тегжейлі статистика 20 тамызда жарияланбақ.
