Астана, 1 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Шанхай ынтымақтастық ұйымының (ШЫҰ) Даму банкін құру жөніндегі Қытай бастамасына қолдау білдіріп, елдің бұл жобаға қатысуға әзір екенін мәлімдеді, деп хабарлады Мемлекет басшысының баспасөз қызметі.
«Қазақстан Қытайдың ШЫҰ Даму банкін құру туралы бастамасын қолдайды және бұл келешегі зор жобаны іске асыруға қатысуға дайын», – деді Тоқаев ШЫҰ-ға мүше мемлекеттер басшыларының кеңесінде сөйлеген сөзінде.
Мемлекет басшысы сонымен қатар Астана халықаралық қаржы орталығы (АХҚО) негізінде перспективті инвестициялық жобаларды сүйемелдейтін ШЫҰ кеңсесін ашуды ұсынды.
«АХҚО базасында ШЫҰ-ның болашағы зор инвестициялық жобаларын қолдайтын және заңгерлік, консалтингтік, қаржылық компаниялардың жұмысын үйлестіретін арнайы кеңсе ашуды ұсынамыз», – деді ол.
Қасым-Жомарт Тоқаев сауда-экономикалық және инвестициялық ынтымақтастықты дамыту – ұйым аясындағы басым бағыттардың бірі екенін атап өтті. Ол ШЫҰ-ның әділ және еркін халықаралық сауданы ілгерілетуге бағытталған нақты қадамдарын қолдайтынын және санкциялық қысым құралдарын пайдалануға қарсы екенін жеткізді.
«ШЫҰ құрылғаннан бері ұйымға мүше елдердің әлемдік ішкі жалпы өнімдегі үлесі екі есе артып, 30 пайызға жетті. Өңірлік сауда айналымы да айтарлықтай ұлғайып, 2024 жылдың қорытындысы бойынша $650 миллиардтан асты. Қазақстанның ШЫҰ елдерімен арадағы тауар айналымы да тұрақты өсіп келеді – былтыр оның көлемі $70 миллиардқа жуықтады», – деді Президент.
